قازاقستاننىڭ قارجى مينيسترلىگى بيزنەس ءۇشىن سالىقتاردى كەيىنگە قالدىرۋ جانە ءبولىپ تولەۋ ءراسىمىن جەڭىلدەتەتىن جاڭا ءتارتىپ ەنگىزدى. بۇل تۋرالى ۆيسە-مينيستر ەرجان ءبىرجانوۆ مالىمدەدى، دەپ حابارلايدى Dalanews.kz.
ونىڭ سوزىنشە، بۇرىن مۇنداي جەڭىلدىكتى الۋ ءۇشىن كاسىپكەرلەر بانك كەپىلدىگىن ۇسىنۋعا نەمەسە مۇلىكتى كەپىلگە قويۋعا مىندەتتى بولعان. وسى تالاپ بەرەشەگى بار كوپتەگەن سالىق تولەۋشىلەرگە ايتارلىقتاي كەدەرگى كەلتىرگەن.
"ءبىز كاسىپكەرلەرگە جاڭا مۇمكىندىك بەردىك. ەندى 1500 اەك-كە دەيىن (شامامەن 5،9 ملن تەڭگە) قارىزى بار بيزنەس سۋبەكتىلەرى مۇلىكتى كەپىلگە قويماي جانە بانك كەپىلدىگىنسىز 1 جىلعا دەيىن سالىق تولەۋدى كەيىنگە قالدىرۋعا نەمەسە ءبولىپ تولەۋگە ءوتىنىش بەرە الادى. بۇل ولاردىڭ كەپىل مۇلكىن باعالاۋ، ساقتاندىرۋ شىعىندارىنان بوساتىپ، راسىمدەۋ ۋاقىتىن ايتارلىقتاي قىسقارتادى"، – دەدى ءبىرجانوۆ.
كاسىپكەرلەر مۇنداي قولداۋعا وزدەرىنە قاراستى كەز كەلگەن اۋداندىق مەملەكەتتىك كىرىستەر دەپارتامەنتى ارقىلى ءوتىنىش بەرە الادى.
