Samarqandta ótken CITES Konventsiiasy Taraptarynyń 20-konferentsiiasynda Qazaqstanǵa kiik múiiziniń halyqaralyq saýdasyn qaita bastaýǵa resmi túrde ruqsat berildi. Osylaisha elimiz kiik múiizine qatysty nóldik eksporttyq kvotany alyp tastady, dep habarlaidy Dalanews.kz.
Qazaqstan delegatsiiasyn Ekologiia jáne tabiǵi resýrstar ministri Erlan Nysanbaev bastap bardy. Delegatsiia quramynda Orman sharýashylyǵy jáne janýarlar dúniesi komiteti, Zoologiia institýty, «Ohotzooprom» jáne bioalýantúrlilikti saqtaý uiymdarynyń ókilderi boldy. Kiik múiizin baqylaý jáne tsifrlyq tańbalaý júiesi boiynsha saraptamalyq qoldaýdy «Tabiǵi Orta» jobasy men «Qazaqtelekom» qamtamasyz etti.
CITES Bas hatshysy Ivonn Igýero Qazaqstannyń kiikti qorǵaýdaǵy jetistikterin joǵary baǵalady. Onyń aitýynsha, kiik popýliatsiiasy tarihi minimým — 21 myń bastan búginde 4 millionnan asyp otyr.
«Bul — áserli nátije. Qazaqstannyń tabysy qatań baqylaý jaǵdaiynda halyqaralyq saýdany qaita bastaýǵa múmkindik berdi», - dedi ol.
Qazaqstan nóldik kvotadan bas tartý — kiikti qorǵaýdan ǵylymi negizdelgen turaqty paidalanýǵa ótýdiń jańa kezeńi ekenin atap ótti. El múiiz saýdasynan túsetin kiristi bioalýantúrlilikti saqtaý men ekojúielerdi qalpyna keltirýge baǵyttaýǵa mindetteldi.
Konferentsiia aiasynda Qazaqstan delegatsiiasy 31 ekijaqty kezdesý ótkizip, Aziia, Afrika jáne Arab elderiniń alańdarynda usynysty qoldaý boiynsha keń jumystar júrgizdi. Daýys berý nátijesinde 111 el (94%) Qazaqstan bastamasyn qoldady, 7 el qarsy boldy.
Bul sheshim kiik popýliatsiiasyn turaqty basqarýdyń Kýnmin–Monreal bioártúrlilik baǵdarlamasynyń mindetterine sáikes keletinin de kórsetti — ekojúie tutastyǵyn saqtaý, tozǵan jaiylymdardy qalpyna keltirý jáne jabaiy janýarlardy utymdy paidalaný.
