Memleket basshysy Qasym-Jomart Toqaev Qazaqstanda úzdik sheteldik joǵary oqý oryndarynyń fılıaldaryn ashýdy tapsyrdy. Bul bastama otandyq ýnıversıtetterdiń ǵylymı jáne akademıalyq áleýetin nyǵaıtýǵa, ozyq álemdik tájirıbeni engizýge jáne elimizdiń bilim berý júıesin transformasıalaýǵa baǵyttalǵan, – dep habarlaıdy Dalanews.kz Abaı oblysy ákiminiń baspasóz qyzmetine silteme jasap.
Búgingi tańda 34 sheteldik joǵary oqý oryndarymen kelisim-shart jasalǵan. Elimizde 23 seriktes ýnıversıtet bar, onda myńdaǵan stýdentter pedagogıka, ınjenerıa jáne jasandy ıntellekt sıaqty 34 mamandyq boıynsha bilim alýda.
Tabysty halyqaralyq yntymaqtastyqtyń jarqyn mysaldarynyń birimen Abaı oblysy ákiminiń orynbasary Jasulan Sársebaev bólisti. 2023 jyldyń mamyr aıynda Semeı qalasyndaǵy Shákárim atyndaǵy ýnıversıtette Bydgosh qalasyndaǵy Ekonomıka ýnıversıtetiniń (WSG University in Bydgoszcz) fılıalyn ashý týraly kelisimge qol qoıyldy.
– Bul fılıal stýdentterge eýropalyq standarttarǵa sáıkes aǵylshyn jáne orys tilderinde bilim alýǵa biregeı múmkindik beredi. Usynylatyn baǵdarlamalarǵa «Sport jáne demalys menejeri» (orys tilinde) jáne «Mehatronıka» (aǵylshyn tilinde) kiredi. Qazir fılıalda 44 stýdent bilim alýda. Oqýdy aıaqtaǵannan keıin olar eýropalyq úlgidegi dıplomǵa ıe bolady, bul oqý úderisin ınternasıonaldandyrýǵa septigin tıgizip, túlekterimizge jańa perspektıvalar ashady, – dep atap ótti Jasulan Sársebaev.
Shákárim ýnıversıtetiniń halyqaralyq yntymaqtastyǵynyń taǵy bir mańyzdy baǵyty – qos dıplomdyq baǵdarlamalardy júzege asyrý. Kúngdong ýnıversıtetimen (Ońtústik Koreıa) IT jáne halyqaralyq bıznes sıaqty salalardaǵy baǵdarlamalar sátti júzege asyrylýda.
– Negizgi maqsattardyń biri – árbir stýdenttiń halyqaralyq deńgeıde bilim alýyna teń múmkindikter berý. Osyǵan oraı ýnıversıtet Qytaı, Ońtústik Koreıa, AQSH, Túrkıa sıaqty túrli elderdiń jetekshi ǵalymdaryn únemi dáris oqýǵa shaqyrady. Sonymen qatar, ýnıversıtette sheteldik oqytýshylar turaqty jumys isteıdi. Osylaısha bilim sapasy jaqsaryp, ınovasıalyq zertteýler engizilýde, bul Shákárim ýnıversıtetiniń ustanymyn nyǵaıta túsedi, – dep qosty ákimniń orynbasary.
Stýdentterdiń daıyndyǵynyń joǵary deńgeıin halyqaralyq reıtıńter rastaıdy. Osylaısha, QS Asia University Rankings 2025 reıtıńinde Shákárim ýnıversıteti Azıadaǵy 984 ýnıversıtet arasynda №501–520 oryndarǵa ıe boldy. Onyń ústine sońǵy eki jylda bul reıtıńtegi JOO sany 142-ge kóbeıse, ýnıversıtet 100 orynǵa alǵa joǵarylady.
Ýnıversıtet ekologıalyq bastamalardy da belsendi damytýda. Turaqty damýdy baǵalaıtyn UI Green Metric World University Ranking 2024 reıtıńinde Shákárim ýnıversıteti álemde 662-orynǵa, al qazaqstandyq ýnıversıtetter arasynda 8-shi orynǵa ıe boldy.
