Búgin oblys ákimi Nurlybek Nálibaevtyń qatysýymen Óner ortalyǵynda "Altyn kúz-2025" saltanatty sharasy ótti. Oǵan Abai oblysynyń ákimi Berik Ýáli, Parlament Senaty men Májilisiniń depýtattary, memleket jáne qoǵam qairatkerleri, Qazaqstannyń Eńbek Erleri, ǵalymdar, óner maitalmandary, respýblikanyń barlyq óńirinen kelgen oblystyq máslihat tóraǵalary arnaiy qatysty, dep habarlaidy Dalanews.kz.
Aimaq basshysy aýyl sharýashylyǵynda atqarylǵan jumystarǵa, agrosalanyń aldaǵy baǵyt-baǵdaryna toqtalyp, qambany toltyryp, bereke men birliktiń úlgisin kórsetken diqandardy quttyqtady.
"Prezidentimiz Qasym-Jomart Kemeluly 2025 jyldy "Jumysshy mamandyqtary jyly" dep jariialap, «Biz jumysshy mamandyqtaryn dáripteý arqyly qoǵamda eńbekqor jáne naǵyz maman bolý ideiasyn nasihattaimyz! Adal ári tabandy eńbegimen tabysqa jetken adamdar qashanda qurmetti, syily bolýy kerek» degen bolatyn.
«Adal adam – Adal eńbek – Adal tabys» qaǵidatyn urpaq sanasyna sińirý, nasihattaý, qarapaiym eńbek adamdaryn dáripteý – bizdiń basty maqsatymyzdyń biri! Syr eliniń dańqyn asqaqtatqan dala akademigi Ybyrai Jaqaev bastaǵan 102 Sotsialistik Eńbek Eriniń jáne táýelsizdik jyldaryndaǵy Qazaqstannyń Eńbek Erleriniń jetistikteri ańyzǵa ainaldy. Sanaly ǵumyrynda týǵan jerimiz úshin aianbai eńbek etken ardaqty ardager aǵalarymyz búgin ortamyzda. Oblysymyzdyń damýyna qosqan orasan zor úlesterińiz úshin Sizderge barsha Syr jurtshylyǵynyń atynan shynaiy alǵysymdy bildiremin. El úshin jasaǵan eren eńbekterińizdiń jemisin, beinetterińizdiń zeinetin kórińizder!», – dedi Nurlybek Mashbekuly.
Abai oblysynyń ákimi Berik Ýáli Syr eliniń eńbekqor jurtyna rizashylyǵyn bildirip, eki óńir arasyndaǵy bailanystyń odan ári nyǵaia túsetinine senim bildirdi.
«Qazaq halqy taǵdyrynyń taiǵaq keshýli kezeńderinde jaǵasyna kelip tynys tapqan, sýyna betin jýyp, úmitin erteńge jalǵaǵan qasietti Syrdariianyń boiynda, ejelgi Aqmeshit, búgingi Qyzylorda tórinde ózderińizben júzdesip otyrǵanyma bek qýanyshtymyn! Biz búgin aimaqtaryńyzǵa úlken delegatsiiamen óner juldyzdaryn, ziialy qaýym ókilderin jáne jaqynda ǵana respýblikalyq baiqaýda bas júlde alǵan teatrymyzdyń arnaiy qoiylymymen kelip otyrmyz. Bul óńiraralyq rýhani-mádeni bailanystardy nyǵaityp, bizdi baýyrlastyra túsedi dep senemiz», – dedi Berik Ýáliuly.
Merekelik sharada Qyzylorda oblysynyń áleýmettik-ekonomikalyq damýyna eleýli úles qosqan azamattar marapattaldy. «Jan Arai» jaýapkershiligi shekteýli seriktestiginiń direktory Baqdáýlet Mahashovqa «Qyzylorda oblysynyń qurmetti azamaty» ataǵy berildi. Ol basqaratyn seriktestik táýligine 80 tonna qurama jem óndirý, kúrish óńdeý zaýyttaryn iske qosqan, ónimderin eksportqa shyǵarady. Ótken jyly 4 myń tonnalyq kókónis saqtaý qoimasyn ashyp, 100-den astam adamdy turaqty jumyspen qamtydy.
Eńbek adamdary men sala úzdikterine «Qyzylorda oblysynyń damýyna qosqan úlesi úshin», Aýyl sharýashylyǵy ministrliginiń «Eńbek ardageri» medaldary, «Aýyl sharýashylyǵy salasynyń úzdigi» tósbelgisi, Qyzylorda oblysynyń Qurmet gramotasy men oblys ákiminiń Alǵys hattary berildi.
Saltanatty sharada aýyl sharýashylyǵy salasynda úzdik jetistikterge jetken ozat aýdandar anyqtalyp, «Balyq sharýashylyǵy salasy boiynsha ozat aýdan» nominatsiiasymen Aral aýdany, «Sý únemdeý tehnologiiasyn qoldaný boiynsha ozat aýdan» nominatsiiasymen Jańaqorǵan aýdany, «Aýyl sharýashylyǵy salasyna investitsiia tartý boiynsha ozat aýdan» nominatsiiasymen Jalaǵash aýdany, «Mal sharýashylyǵy salasy boiynsha ozat aýdan» nominatsiiasymen Qarmaqshy aýdany, «Aýyl sharýashylyǵy ónimderin óńdeý salasy boiynsha ozat aýdan» nominatsiiasymen Qazaly aýdany, «Egin sharýashylyǵy salasy boiynsha ozat aýdan» nominatsiiasymen Syrdariia aýdany marapattalady.
Al «Agroónerkásip keshenin damytýda biylǵy jyly eń joǵarǵy kórsetkishterge qol jetkizgen úzdik aýdan» nominatsiiasyn Shieli aýdany jeńip aldy.
Jyldaǵy dástúr boiynsha joǵary kórsetkishterge qol jetkizgen «Abzal jáne K» TS, «Maǵjan jáne K», «Abai-Dáýlet» JShS eńbek ozattaryna avtokólik kiltteri syiǵa berildi.
