Qazaqstannyń ishki ister mınıstri Erjan Sádenov ortalyq apparat, aýmaqtyq polısıa departamentteri men Ulttyq ulannyń óńirlik qolbasshylary qatysqan keńeıtilgen alqa otyrysyn ótkizdi. Jıynda mınıstr tártip buzǵan jáne qyzmetine salǵyrt qaraıtyn polıseılerdi qatań synǵa aldy, dep habarlaıdy Dalanews.kz.
"Qyzmettiń barlyq qıyndyǵy men táýekelderine qaramastan, polısıa qyzmetkerleriniń basym bóligi óz mindetin adal atqaryp júr. Kún saıyn myńdaǵan polıseı el tynyshtyǵyn qorǵap, naǵyz erlik kórsetedi. Alaıda birli-jarym tártip buzýshylyq sol eńbektiń bárin joqqa shyǵarady. Bul - bizge syn", - dedi Sádenov.
Mınıstr aýmaqtyq departamentter basshylaryna qyzmettik tártipti kúsheıtýdi, jeke qurammen profılaktıkalyq jumys júrgizýdi jáne jas qyzmetkerlerge tálimgerlik ınstıtýtyn jandandyrýdy tapsyrdy. Sonymen qatar qyzmettik tártipti jıi buzatyn tulǵalarǵa erekshe baqylaý ornatyp, túzelmegen qyzmetkerlerge qatysty naqty kadrlyq sheshim qabyldaý qajettigin eskertti.
Alqa otyrysynda 2025 jyldyń toǵyz aıyndaǵy jumys qorytyndylary shyǵarylyp, aldaǵy kezeńge basym baǵyttar aıqyndaldy.
"Memleket basshysynyń tapsyrmasyna sáıkes mınıstrlik qoǵamda «Zań jáne tártip» qaǵıdatyn jáne kez kelgen quqyq buzýshylyqqa «nóldik tózimdilik» ustanymyn nyǵaıtýdy jalǵastyryp keledi. Nátıjesinde qylmys sany 7 paıyzǵa azaıdy. Kisi óltirý, aýyr dene jaraqatyn salý, tonaý, qaraqshylyq, buzaqylyq jáne urlyq faktileri tómendedi", — delingen habarlamada.
Qoǵamdyq oryndar men kóshelerde de quqyq buzýshylyqtar azaıǵan.
"Eń bastysy - adamdardyń qaýipsizdigi. Tulǵaǵa qarsy qylmystardyń azaıýy - az qaıǵy men kóbirek qorǵanysh", - dedi mınıstr.
Sonymen qatar Erjan Sádenov uıymdasqan qylmysqa qarsy is-qımyldy kúsheıtýdi, tabıǵı jáne bıologıalyq resýrstardy zańsyz óndirýmen baılanysty qylmystyq shemalardy anyqtaýdy jáne halyqaralyq kólik baǵyttaryndaǵy júk qaýipsizdigin qamtamasyz etýdi tapsyrdy. Mınıstr ásirese mal urlyǵyna erekshe nazar aýdaryp, aýyl turǵyndarynyń tabysy men tynyshtyǵyna tikeleı áser etetin bul másele boıynsha aldyn alý sharalaryn kúsheıtýdi júktedi.
Otyrysta otbasylyq-turmystyq zorlyq-zombylyqpen jáne jasóspirimder qylmysymen kúres te qaraldy.
"Sońǵy jyldary bul baǵytta eleýli ózgerister bar: zorlyq-zombylyqtyń aldyn alý erte kezeńde qolǵa alynýda, uryp-soǵý áreketteri qylmystyq sıpatqa ıe boldy. Arnaıy bólimshe qurylyp, 70 myńnan astam qorǵaný nusqamasy shyǵaryldy. Degenmen keı óńirlerde polısıanyń áreketi der kezinde bolmaı otyr", - dedi mınıstr.
Jyl basynan beri jasóspirimderge qatysty 1600-ge jýyq quqyq buzýshylyq tirkelgen.
"Negizgi sebep - ata-analyq baqylaýdyń álsizdigi. Túngi ýaqytta balalaryn qaraýsyz qaldyrǵan 107 myńnan astam ata-ana jáne tyıym salynǵan ýaqytta kámeletke tolmaǵandardy kirgizgen 1900-ge jýyq oıyn-saýyq ornynyń ıesi ákimshilik jaýapkershilikke tartyldy", - dep habarlady İİM.
