Almaty qalasynyń ákimi Darhan Satybaldy Tótenshe jaǵdailar departamentiniń Mamandandyrylǵan jasaǵyna baryp, bólimsheniń qyzmetimen tanysty, dep habarlaidy Dalanews.kz.
1981 jyly paidalanýǵa berilgen bul nysan Jetisý aýdanynyń ortalyq bóliginiń órtke qarsy qorǵalýyn qamtamasyz etedi. Munda 124 qutqarýshy qyzmet atqarady, olardyń qaramaǵynda 29 birlik arnaiy tehnika bar. 2023 jyldyń sońynda ǵimaratta kúrdeli jóndeý jumystary aiaqtalyp, bul jasaqtyń jumys tiimdiligin edáýir arttyrýǵa múmkindik berdi.
Qutqarýshylar kún saiyn qala turǵyndarynyń qaýipsizdigin qorǵap, joǵary kásibilik pen isine adaldyq tanytyp keledi. Qala ákimi olardyń eńbeginiń mańyzdylyǵyn atap ótip, tótenshe qyzmet bólimshelerin qoldaý qala ákimdiginiń basty basymdyǵy ekenin aitty.
Jyl saiyn Almatyda jańa órt sóndirý bólimsheleri ashylyp, bul shalǵai aýdandardyń qorǵanysyn kúsheitýge jáne jedel qyzmetter infraqurylymyn damytýǵa múmkindik beredi. Ásirese, jańa jáne jyldam ósip kele jatqan turǵyn aýdandarda órt sóndirý depolaryn salýǵa erekshe kóńil bólinedi, bul órt sóndirýshilerdiń jetý ýaqytyn qysqartýǵa jáne tótenshe jaǵdailarǵa jedel áreket etýge yqpal etedi.
Qazirgi tańda Almatyda órtke qarsy qyzmettiń 20 bólimshesi jumys isteidi. Alaida qala aýmaǵynyń ulǵaiýyna bailanysty TJD mamandarynyń baǵalaýynsha, qalaǵa keminde taǵy 15 órt sóndirý bólimi qajet.
Jaqyndaǵy josparǵa Bostandyq jáne Medeý aýdandarynda tórt jańa órt sóndirý deposyn salý kiredi.
2016 jyldan 2025 jylǵa deiin Almaty qalasy TJD-nyń avtoparki 162 tehnikamen tolyqty, onyń 129-y jergilikti biýdjet esebinen satyp alyndy. Bul materialdyq-tehnikalyq bazany nyǵaityp, halyqty qorǵaý boiynsha mindetterdi tiimdi oryndaýǵa múmkindik beredi.
