Depýtattar Ermurat Bapi men Rinat Zaiytov Nurbol Nazarbaevtyń áreketterin tekserýdi surap, Bas prokýrorǵa saýal joldaǵan edi. Olardyń suraýyna jaýap bergen Bas prokýror Berik Asylov Qýat Ermentaevtyń aryzy negizinde qosymsha tergeý bastalǵanyn rastady, dep habarlaidy Dalanews.kz.
Asylovtyń málimetinshe, Almaty qalasy boiynsha Ekonomikalyq tergep-tekserý departamenti Qýat Ermentaevqa tiesili «PORUS» JShS-niń jarǵylyq kapitalynyń 16 paiyzdyq úlesin zańsyz qaita tirkeý faktisi boiynsha tergeý júrgizgen. Bul is Qylmystyq kodekstiń 249-babynyń 1-bóligi boiynsha qozǵalǵan.
2024 jyldyń 22 aqpanynda qylmys quramy tabylmaǵandyqtan is toqtatylǵan. Alaida biyl 9 qazanda sotqa deiingi materialdardy qaita zerdeleý jáne Ermentaev keltirgen jańa dálelder negizinde bul sheshimniń kúshi joiylyp, qosymsha tergeý bastalǵan.
«Qazir Almaty qalasy boiynsha ETD keltirilgen faktilerdi jan-jaqty jáne obektivti tekserýge baǵyttalǵan qosymsha tergeý áreketterin júrgizip jatyr. Tergeý barysy prokýratýra organdarynyń turaqty baqylaýynda», – dep málimdedi Bas prokýratýra.
Depýtat Ermurat Bapi buǵan deiin Bas prokýrorǵa joldaǵan saýalynda Qýat Ermentaevtyń «Nurbol Nazarbaev tarapynan jasalǵan qysym men reiderlik áreketten keiin bar múlkinen aiyrylyp qalǵanyn» aitqan bolatyn. Onyń sózinshe, Ermentaev ádildik surap, óz biznesin qaitarýdy ótingen.
Eske sala ketsek, jýyrda Bolat Nazarbaevtyń uly Nurbol Nazarbaev ózin bankrot dep taný týraly sotqa aryz túsirgeni habarlanǵan edi.
