Memleket basshysy Qasym-Jomart Toqaevtyń bilim berý salasyn damytýǵa baǵyttalǵan strategiialyq tapsyrmasy boiynsha, elimizdegi tuńǵysh joǵary oqý orny – Abai atyndaǵy Qazaq ulttyq pedagogikalyq ýniversitetiniń Astana qalasynda Bilim berý institýtynyń tusaýy kesildi. Oǵan QR Ǵylym jáne joǵary bilim vitse-ministri Gúlzat Kóbenova, Abai atyndaǵy QazUPÝ Basqarma tóraǵasy-rektor Bolat Tilep jáne oqytýshy-professorlar, stýdentter qatysty. Abai ýniversiteti Bilim berý institýtynyń ashylýy Astana qalasy men soltústik óńirdegi pedagogikalyq kadr tapshylyǵyn joiýǵa baǵyttalǵan mańyzdy jobalardyń biri, dep habarlaidy Dalanews.kz.
Qazirgi tańda respýblika boiynsha 70 myńnan asa gýmanitarlyq, bastaýysh, jaratylystaný jáne matematika pánderiniń muǵalimderi qajet. Al Eńbek jáne halyqty áleýmettik qorǵaý ministrliginiń deregine súiensek, 2025-2035 jyldar aralyǵynda bilim salasyna maman qajettiligi 447 myńǵa deiin artady dep kútilýde. Osy qajettilikti eskere otyryp, Elordada Qazaqstan jáne Ortalyq Aziiadaǵy kóshbasshy pedagogikalyq oqý oryny – Abai ýniversitetiniń Bilim berý institýty bilim alýshylarǵa esigin aiqara ashty. Maqsaty – Astana qalasy men soltústik óńirdiń bilim oshaqtaryna zamanaýi bilikti de sapaly mamandar daiarlap, suranysty qanaǵattandyrý.
– Bul Bilim berý institýtynyń ashylýy Prezident tapsyrmasy boiynsha júzege asyp otyr. Byltyr Abai atyndaǵy QazUPÝ jáne L.Gýmilev atyndaǵy EUÝ kontsortsiýmy negizinde jumysty bastaǵany belgili. Biyl Abai ýniversitetiniń sol institýty jeke óz aldyna shańyraq kóterdi. Oǵan ǵimarat bólip, jaǵdai jasaǵan Astana qalasynyń ákimine jáne basy-qasynda bolǵan Abai ýniversitetiniń basshylyǵyna zor alǵysymdy bildiremin, – dedi Bilim berý institýtynyń tusaýkeser rásiminde sóz sóilegen QR Ǵylym jáne joǵary bilim vitse-ministri Gúlzat Izbasarqyzy.
Tulǵa ǵana emes, Tulǵa tárbieleitin Ustaz qalyptastyrýdy basty missiiasy etip alǵan Abai ýniversitetiniń Bilim berý institýty qazirgi zamanǵy ozyq tehnologiialarmen jabdyqtalǵan. Bilim oshaǵynda 9 bilim berý baǵdarlamasy boiynsha 400-den astam stýdent oqidy. Olardyń 288-i memlekettik grant negizinde oqysa, 133-i Astana qalasy ákiminiń granty. Oqý baǵyttary arasynda aqparattyq, matematika, jaratylystaný, psihologiia jáne asa suranysqa ie arnaiy pedagogikalyq mamandyqtar: defektologiia, logopediia, tiflopedagogika, sýrdopedagogika, t.b. bar. Oqytýshy-professorlar quramynda 3 ǵylym doktory, 4 ǵylym kandidaty jáne 2 PhD dárejesine ie ǵalym, jalpy sany 31 tájiribeli maman qyzmet atqarýda.
Abai atyndaǵy QazUPÝ-dyń Basqarma tóraǵasy-rektor Bolat Tilep jańa ǵimaratqa kirip, qýanyshtary qoinyna syimai turǵan stýdent jastarǵa:
– Sizder Prezidenttiń tikelei tapsyrmasymen daiyndalyp jatqan kadr bolǵandyqtan, erteńgi memleket bolashaǵyna qyzmet etetin sapaly maman bolýlaryńyz kerek, – degen aqjarma tilegin jetkizdi.
Qazirde Abai atyndaǵy QazUPÝ men Astana qalasy ákimdigi ózara tyǵyz bailanysta jumys istep jatyr. Ekijaqty qol qoiylǵan memorandýmǵa sáikes, ýniversitet stýdentteri jyl saiyn Astana mektepterinde tájiribeden ótedi. Byltyr 200-den astam shákirt teoriialyq bilimderin tájiribemen ushtastyrýǵa múmkindik aldy. Bolashaqta osy pedagogikalyq mamandar Astana men soltústik óńirdegi kadr tapshylyǵy suranysyna tolyqtai jaýap degen úmit basym.
