Ulttyq Bank aqsha aiyrbastaý pýnktteri arqyly júrgiziletin operatsiialar boiynsha teńgege shetel valiýtasyn satyp alý baǵamynyń satý baǵamynan aýytqý shekterin belgileý týraly qaýly jobasyn ázirledi, dep jazady Dalanews.kz.
Ulttyq bank baspasóz qyzmetiniń málimetinshe, jobaǵa sáikes aqsha aiyrbastaý pýnktteri arqyly júrgiziletin operatsiialar boiynsha teńgege shetel valiýtasyn satyp alý baǵamynyń satý baǵamynan aýytqý shegi AQSh dollary úshin – 7 teńge, evro úshin – 10 teńge deiin belgileý usynylady.
"Usynylǵan ózgerister, eń aldymen, valiýta naryǵyndaǵy alypsatarlyq áreketterdi tómendetýge, sondai-aq qarjy naryǵyna qatysýshylardyń táýekelderin seiiltýge baǵyttalǵan", - deidi retteýshi organ 2025 jyly 14 qańtarda.
Ortalyq bank bul shekteýler qolma-qol aqshasyz nysanda júrgiziletin aqsha aiyrbastaý operatsiialaryna áser etpeidi dep sendiredi.
Buǵan deiin Bank TsentrKredit bankomattary 31 qańtarǵa deiin AQSh dollaryn berýdi doǵarǵanyn jazǵan bolatynbyz. Onyń sebebin bank aitpady.
Al 1 qańtardan bastap elimizde dollar satyp alýǵa qatysty shekteýler engizildi. Oǵan sáikes, budan bylai eger qazaqstandyq kompaniia 1 jumys kúni ishinde 50 000 AQSh dollarynan asatyn qolma-qol aqshasyz shetel valiýtasyn satyp alǵysy kelse, onda ol valiýtany ne úshin satyp alyp jatqanyn, maqsatyn naqty kórsetýge tiis bolady. Sondai-aq bankke valiýtalyq shartty usynýǵa mindetteledi.
Eger kompaniia, zańdy tulǵa sol satyp alǵan 50 000 AQSh dollarynan asatyn somanyń bir bóligin 10 jumys kúni ishinde paidalanbasa, onda paidalanylmaǵan valiýtany bankke keri satýǵa mindetti bolady.
Bul talap tek jalpy jiyntyǵynda 50 myń dollardan asatyn somalarǵa taralady.
