ۇلتتىق بانك اقشا ايىرباستاۋ پۋنكتتەرى ارقىلى جۇرگىزىلەتىن وپەراسيالار بويىنشا تەڭگەگە شەتەل ۆاليۋتاسىن ساتىپ الۋ باعامىنىڭ ساتۋ باعامىنان اۋىتقۋ شەكتەرىن بەلگىلەۋ تۋرالى قاۋلى جوباسىن ازىرلەدى، دەپ جازادى Dalanews.kz.

ۇلتتىق بانك باسپا ءسوز قىزمەتىنىڭ مالىمەتىنشە، جوباعا سايكەس اقشا ايىرباستاۋ پۋنكتتەرى ارقىلى جۇرگىزىلەتىن وپەراسيالار بويىنشا تەڭگەگە شەتەل ۆاليۋتاسىن ساتىپ الۋ باعامىنىڭ ساتۋ باعامىنان اۋىتقۋ شەگى اقش دوللارى ءۇشىن – 7 تەڭگە، ەۆرو ءۇشىن – 10 تەڭگە دەيىن بەلگىلەۋ ۇسىنىلادى.

"ۇسىنىلعان وزگەرىستەر، ەڭ الدىمەن، ۆاليۋتا نارىعىنداعى الىپساتارلىق ارەكەتتەردى تومەندەتۋگە، سونداي-اق قارجى نارىعىنا قاتىسۋشىلاردىڭ تاۋەكەلدەرىن سەيىلتۋگە باعىتتالعان"، - دەيدى رەتتەۋشى ورگان 2025 جىلى 14 قاڭتاردا.

ورتالىق بانك بۇل شەكتەۋلەر قولما-قول اقشاسىز نىساندا جۇرگىزىلەتىن اقشا ايىرباستاۋ وپەراسيالارىنا اسەر ەتپەيدى دەپ سەندىرەدى.

بۇعان دەيىن بانك سەنتركرەديت بانكوماتتارى 31 قاڭتارعا دەيىن اقش دوللارىن بەرۋدى دوعارعانىن جازعان بولاتىنبىز. ونىڭ سەبەبىن بانك ايتپادى.

ال 1 قاڭتاردان باستاپ ەلىمىزدە دوللار ساتىپ الۋعا قاتىستى شەكتەۋلەر ەنگىزىلدى. وعان سايكەس، بۇدان بىلاي ەگەر قازاقستاندىق كومپانيا 1 جۇمىس كۇنى ىشىندە 50 000 اقش دوللارىنان اساتىن قولما-قول اقشاسىز شەتەل ۆاليۋتاسىن ساتىپ العىسى كەلسە، وندا ول ۆاليۋتانى نە ءۇشىن ساتىپ الىپ جاتقانىن، ماقساتىن ناقتى كورسەتۋگە ءتيىس بولادى. سونداي-اق بانككە ۆاليۋتالىق شارتتى ۇسىنۋعا مىندەتتەلەدى.

ەگەر كومپانيا، زاڭدى تۇلعا سول ساتىپ العان 50 000 اقش دوللارىنان اساتىن سومانىڭ ءبىر بولىگىن 10 جۇمىس كۇنى ىشىندە پايدالانباسا، وندا پايدالانىلماعان ۆاليۋتانى بانككە كەرى ساتۋعا مىندەتتى بولادى.

بۇل تالاپ تەك جالپى جيىنتىعىندا 50 مىڭ دوللاردان اساتىن سومالارعا تارالادى.