Vetnamnan Ekaterınbýrgke bet alǵan ondaǵan jolaýshy Taraz áýejaıynyń tranzıttik aımaǵynda qalyp qoıdy. Josparlanǵan tehnıkalyq aıaldama bir táýlikke jýyq ýaqytqa sozylǵan, dep habarlaıdy Dalanews.kz.

Tengrinews redaksıasynyń baılanys nómirine jolaýshylardyń biri habarlasqan. Onyń aıtýynsha, SCAT áýe kompanıasynyń ushaǵy Tarazǵa josparly janarmaı quıý úshin qonǵan. Alaıda kózdelgen bir saǵattyń ornyna jolaýshylar «taza aımaqta» shamamen bir táýlikke jýyq, 18 saǵattan astam ýaqyt ótkizýge májbúr bolǵan.

Jolaýshynyń sózinshe, reıs birneshe ret keıinge shegerilgen: áýeli bir saǵatqa, keıin taǵy birneshe márte. Alaıda áýe kompanıa ókilderi kidiristiń naqty sebebin túsindire almaǵan. Sonymen qatar tasymaldaýshynyń call-ortalyǵy da qoljetimsiz bolǵan.

«Tutas bir ushaqtaǵy jolaýshylar Taraz áýejaıynda turyp qaldy. 14 saǵattan astam ýaqyt boıy bizge tek “biz eshteńe bilmeımiz” degen jaýap qana aıtylyp keledi. Baılanys joq. Kompanıa ókilderi bizdi aqparatsyz, kómeksiz áýejaı ǵımaratynda qaldyryp ketti», - dedi Reseı azamaty.

Áýe kompanıasynyń baspasóz qyzmeti uzaq kidiris bolǵanyn rastady jáne onyń tehnıkalyq sebepterge baılanysty ekenin habarlaǵan. 

«2026 jylǵy 20 qańtarda oryndalǵan Fýkýok – Taraz – Ekaterınbýrg baǵyty boıynsha VSV5322/451 charterlik reıs keshiktirildi. Ushaqty ushýǵa daıyndaý barysynda qosymsha tehnıkalyq qyzmet kórsetý qajettiligi anyqtaldy», - dep túsindirdi tasymaldaýshy.

Kompanıa ókilderi jolaýshylardyń jaılylyǵy úshin barlyq qajetti sharalar qabyldanǵanyn atap ótti.