Ulttyq kontingenttiń injenerlik-saperlik toby BUU mandatyna sáikes Golan biiktikterinde júktelgen mindetterdi sátti oryndap keledi, dep habarlaidy Dalanews.kz.
2025 jylǵy 11 sáýirden bastap áskeri qyzmetshiler 44 operatsiia júrgizip, 1200-den astam jarylǵysh zat pen 43 qoldan jasalǵan jarylǵysh qurylǵyny joidy. Sonymen qatar, qazaqstandyq saperlar jergilikti aýmaqta, BUU bazalary men baqylaý beketterinde bes izdestirý is-sharasyn ótkizip, minaly alqaptarǵa úsh barlaý shyǵýyn júzege asyrdy.
Sondai-aq, anyqtalǵan oq-dárilerge 11 márte aldyn ala zerdeleý jumysy jasaldy. Jaýapkershilik aimaǵynda injenerlik-saperlik top áskeri personaldyń, BUU nysandarynyń jáne beibit turǵyndardyń qaýipsizdigin qamtamasyz etýde.
– Biz minaly alqaptarǵa barlaý júrgizemiz, BUU bazalary men baqylaý beketterin tekseremiz, jarylǵysh zattar men qoldan jasalǵan jarylǵysh qurylǵylardy joiamyz. Tabylǵan barlyq oq-dáriler – Siriia aýmaǵyndaǵy qarýly qaqtyǵystardyń qaýipti murasy, – dedi Bitimgerlik operatsiialary ortalyǵynyń materialdyq-tehnikalyq qamtamasyz etý basqarmasynyń ofitseri maior Ernar Amantaiuly.
Golan biiktikterine jiberiler aldynda áskeri qyzmetshiler Almaty garnizonyndaǵy Bitimgerlik operatsiialary ortalyǵynda jáne Qonaev garnizonynyń minasyzdandyrý ortalyǵynda keshendi arnaiy daiyndyqtan ótti. Onda olar gýmanitarlyq minasyzdandyrýdyń úsh deńgeili kýrsyn meńgerdi.
Osylaisha, Qazaqstannyń injenerlik áskerleriniń áskeri qyzmetshileri el ishinde ásker men azamattyq halyqtyń qaýipsizdigin qamtamasyz etip qana qoimai, BUU missiialary aiasynda beibitshilik pen turaqtylyqty nyǵaitýǵa da eleýli úles qosýda.
