Qazaqstanda zorlyq-zombylyq úshin jaýapkershilikti kúsheitý máselesi qaita kóterildi, dep habarlaidy Dalanews.kz.
Májilis depýtaty Murat Ábenov zorlaý babyn qatańdatyp, ony asa aýyr qylmys sanatyna engizýdi usyndy.
Halyq qalaýlysynyń aitýynsha, qazirgi zańdaǵy jaza kólemi qoǵamdaǵy qaýiptiń deńgeiine sai emes. Búginde qalyńdyqty alyp qashý nemese nekege májbúrleý úshin jaza 10 jylǵa deiin kúsheitilse, zorlaý faktileri úshin qarastyrylǵan jaza odan jeńilirek bolyp otyr. Bul quqyqtyq olqylyq qylmyskerlerdi jaýapkershilikten jaltarýǵa itermeleýi múmkin.
– Nekege májbúrlegeni úshin 10 jylǵa deiin jaza bar, al zorlaý úshin 3 jyldan 8 jylǵa deiin ǵana. Bul qisynsyz. Zorlaý – odan da aýyr qylmys. Sondyqtan ony asa aýyr qylmys retinde qarastyrý qajet, – dedi depýtat.
Onyń pikirinshe, jazadaǵy mundai aiyrmashylyq keibir adamdardy qylmystyń aýyr túrine barýǵa itermeleýi yqtimal. Sol sebepti zańnamada naqty tepe-teńdik bolýy tiis.
Murat Ábenov bul bastamany ózi kóterip, tiisti túzetýlerdi ázirleýge daiyn ekenin málimdedi. Depýtattyń usynysy qoǵamda áielder men balalardyń qaýipsizdigin kúsheitýge baǵyttalǵan qadam retinde baǵalanyp otyr.
