Oljas Bektenov Memleket basshysy Qasym-Jomart Toqaevtyń Ulttyq quryltaıdyń 5‑shi otyrysynda aıtqan saıası reformalardy jalǵastyrýǵa arnalǵan bastamalaryn qoldaıtynyn jáne olardy iske asyrýda naqty nátıjeler qajet ekenin atap ótti, dep habarlaıdy Dalanews.kz.

«Qurmetti áriptester! Keshe ótken Ulttyq quryltaıdyń 5‑shi otyrysynda Memleket basshysy Qasym-Jomart Kemeluly Toqaev  buǵan deıingi aýqymdy saıası reformalarynyń jalǵasy bolyp tabylatyn bastamalaryn jarıa etti.

Memleket basshysy Parlament pen qoǵamdyq ınstıtýttardyń rólin kúsheıtý arqyly elimizdiń demokratıalyq júıesin ári qaraı damytýǵa baǵyttalǵan mańyzdy tapsyrmalar berdi. Bul bastamalar qoǵamdaǵy ádildik, otanshyldyq jáne «Zań men Tártip» qaǵıdattaryn odan ári nyǵaıtýǵa yqpal etedi», – dedi Premer-mınıstr.

Oljas Bektenov sonymen qatar, árbir mınıstr men ákimge batyl ári ınovasıalyq sheshimder qabyldaý qajettigine erekshe nazar aýdardy.

«Jaýapty laýazymdy tulǵalar tek jospar quryp qana qoımaı, óz salasynda naqty, kózge kórinetin nátıjeler kórsetýi tıis. Bul talap ómirdiń barlyq salasyna qatysty», – dedi ol.

Premer-mınıstrtiń aıtýynsha, «Taza Qazaqstan» jobasy jáne ekonomıkalyq damý baǵdarlamalary da óńirlerde júıeli túrde júzege asyrylýy kerek. Osy arqyly halyqtyń ómir súrý sapasyn jaqsartý jáne Qazaqstannyń turaqty damý maqsattaryna qol jetkizý qamtamasyz etiledi.