Qazaqstanda 1996 jyly joiylǵan vitse-prezident laýazymy qaita engizilmek. El tarihynda atalǵan qyzmetti alǵash ret memleket qairatkeri Erik Asanbaev atqarǵan, dep habarlaidy Dalanews.kz.
Vitse-prezident qyzmeti 1996 jyly 22 aqpanda eks-prezident Nursultan Nazarbaevtyń jarlyǵymen kúshin joidy. Sol ýaqytta bul qyzmetti atqarǵan Erik Asanbaev qyzmetinen bosatylyp, vitse-prezident institýty memlekettik basqarý júiesinen alynyp tastaldy.
Araǵa shamamen 30 jyl salyp, atalǵan institýtty qaita jańǵyrtý bastamasy kóterilip otyr. Bul qadam memlekettik basqarý júiesin jetildirý jáne atqarýshy biliktiń tiimdiligin arttyrýǵa baǵyttalǵan.
Erik Asanbaev kim?
Erik Asanbaev - Qazaqstannyń memleket qairatkeri, diplomat, ekonomika ǵylymdarynyń doktory. Ol Qazaqstan tarihyndaǵy tuńǵysh ári ázirge jalǵyz vitse-prezident retinde belgili.
Eks-sheneýnik 1991 jyly Qazaqstan táýelsizdik alǵannan keiin vitse-prezident qyzmetine taǵaiyndaldy. Buǵan deiin partiialyq jáne memlekettik basqarý júiesinde túrli jaýapty qyzmetter atqarǵan. Erik Asanbaev eldiń alǵashqy saiasi reformalaryna qatysyp, ótpeli kezeńdegi memlekettik institýttardyń qalyptasýyna atsalysty.
1994–1996 jyly QR Prezidenti janyndaǵy adam quqyqtary jónindegi komissiianyń tóraǵasy qyzmetin atqardy. Vitse-prezident laýazymy joiylǵannan keiin 1996 jyldyń aqpanynan 2000 jylǵa deiin QR-nyń Germaniia Federativtik Respýblikasyndaǵy Tótenshe jáne ókiletti elshisi bolǵan. Erik Asanbaev 2004 jyly 23 tamyzda ómirden ótti.
