Jaqynda Almaty oblysy UQK departamentine qarasty Sybailas jemqorlyqqa kúres qyzmetkerleri Ile aýdandyq politsiia basqarmasynyń ÁQB (OAP) inspektory, leitenant Nurǵalim Álimǵojaevty para alý sátinde ustaǵany týraly aqparat tarady. Belgili zańger Moldahan Ádilethan atalǵan jaǵdaiǵa bailanysty tyń aqparatty bólisti, dep habarlaidy Dalanews.kz.
Zańgerdiń aitýynsha, ol politsiia qyzmetkerleri ustalǵanǵa deiin jol-kólik oqiǵasyna túsken azamatpen jeke sóilesken. Sol kezde jábirlenýshi basynan ótken jaǵdaidy búkpesiz baiandap bergen. Bul áńgime beinejazbaǵa da túsirilgen.
Moldahan Ádilethan kórsetken videoda jábirlenýshi jol apatynan keiin kóligin aiypturaqtan alyp ketý úshin politsiia bólimine barǵanyn aitady. Alaida sol jerde inspektorlar tarapynan qomaqty aqsha talap etilgen.
“Jemqorlyqqa jol joq” dep urandatqanymen, is júzinde bári basqasha. Jol-kólik oqiǵasyna túsken júrgizýshi kóligin aiypturaqtan alyp ketý úshin politsiia bólimine barǵanda, odan tikelei 300 myń teńge talap etilgen”, - deidi zańger.
Videoda jábirlenýshi kóligimen taksi bolyp kún kórip júrgenin, apattan keiin kóliginiń jaramsyz bolyp qalǵanyn aitady. Onyń ústine aiyppul, evakýatsiia, aiypturaq shyǵyndary qosylyp, sodan soń para talap etilgen. Bul onyń jaǵdaiyn odan ári qiyndatqan.
“Munda eń mańyzdysy - para alý faktisi keiin emes, aldyn ala aitylǵan. Iaǵni “jel turmasa, shóptiń basy qimyldamaidy”. Bul adam ótirik aityp otyrǵan joq. Ol bári jariia bolmai turyp-aq shyndyqty ashyq jetkizgen”, - deidi zańger.
Jábirlenýshiniń aitýynsha, aqsha suraý bir inspektormen shektelmegen. Isti “retteitin” taǵy bir qyzmetker aralasyp, “aqshań bolmasa, Kaspi ash, kredit al” degen sózge deiin barǵan. Bul jait jábirlenýshige moraldyq qysym bolǵan.
Sonymen qatar ol taǵy bir kúmándi jaitty alǵa tartty. Sózinshe, jol apatyna bailanysty hattama oqiǵa ornynda bolmaǵan basqa inspektordyń atyna toltyrylǵan.
“Túngi ýaqytta basqa politsiia qyzmetkeri kelip, qujat rásimdegen. Al bastapqyda aqsha suraǵan inspektor ol kezde bolmaǵan”,- dep qosty zańger.
Zańger jol apatynyń ózine de nazar aýdarý qajet ekenin aitady. Onyń aitýynsha, apat bolǵan jerde jol belgileri qoiylmaǵan, qaýipti burylys eskertilmegen.
“Mundai jaǵdaida nege barlyq jaýapkershilik tek júrgizýshige artylady? Jol qaýipsizdigine jaýapty memlekettik organdar nege nazardan tys qalady?”, - deidi ol.
Zańger bul aitylǵandardyń barlyǵy politsiia qyzmetkerleri para alý kezinde ustalǵanǵa deiin bolǵanyn erekshe atap ótti. Keiin dál sol qyzmetkerlerdiń ustalǵany jábirlenýshiniń sózin rastaǵan.
Zańgerdiń pikirinshe, bul jeke bir qyzmetkerdiń emes, júieli problemanyń kórinisi. Ol mundai jaǵdaida tek oryndaýshylar emes, olardyń tikelei basshylary da jaýapkershilikke tartylýy tiis ekenin aitty.
“Memleket basshysy “eger qyzmetker jemqorlyqpen ustalǵan bolsa, onyń basshysy da jaýap berýi kerek” degen edi. Bul - birinshi jaǵdai emes. Biraq soǵan qaramastan, jaýapty tulǵalar áli de qyzmetinde otyr”, - dedi zańger.
Zańger bul oqiǵa quqyq qorǵaý organdaryndaǵy ishki baqylaý men jaýapkershilik máselesin qaita kóterýi tiis ekenin atap ótti.
