Depýtat Edil Jańbyrshin Májilis otyrysynda birneshe qaladaǵy jylý elektr ortalyqtarynyń qurylysy nelikten áli bastalmaǵanyn surady, dep habarlaidy Dalanews.kz.
Edil Jańbyrshin premer-ministrdiń birinshi orynbasary Roman Skliarǵa depýtattyq saýal joldady.
"Búginde Qazaqstannyń bai resýrstyq áleýetine qaramastan, energetikalyq júiemizdiń beriktik qory eń tómengi shekke jetti, iaǵni el is júzinde "energetikalyq tyǵyryqqa" tireldi. Bul eskirgen tehnologiialarmen jumys isteitin energetikalyq nysandar men infraqurylymnyń ábden tozýyna jáne zamanaýi sheshimderdi qoldana otyryp, ýaqtyly jańǵyrtylmaýyna bailanysty.
Munai-gaz sektoryn eseptemegende, elimizdegi kómir qory 33 mlrd tonnaǵa baǵalanady, bul tiimdi paidalanǵan jaǵdaida úsh ǵasyrǵa jetedi. Kórshilerimiz kómir otynymen jumys isteitin ekologiialyq taza ári ikemdi generatsiiany igerip úlgerdi. Al biz áli kúnge deiin ziian ári tiimsiz eski tehnologiialardy jamap-jasqap ustap otyrýǵa májbúrmiz", - dedi ol.
Depýtat Memleket basshysy kómir generatsiiasyn damytýdy ulttyq joba deńgeiine shyǵarý týraly naqty tapsyrma bergenin eske saldy.
"Áńgime eski, ekologiialyq turǵydan tiimsiz tehnologiialarǵa qaita oralý týraly emes, tiimdiligi joǵary jáne qorshaǵan ortaǵa túsetin salmaǵy minimaldy jańa býyn elektr stantsiialaryn salý týraly bolyp otyr. Eonomikany senimdi ári turaqty energiiamen qamtamasyz etpeiinshe, indýstriialandyrý naqty mazmunynan aiyrylady, al tsifrlandyrý tek deklaratsiia kúiinde qalý qaýpi bar.
Qazirgi kezeńniń eń ózekti máseleleriniń biri – strategiialyq mańyzy bar energetikalyq jobalardyń kóp jyl boiy qaǵaz júzinde qalyp, is júzinde júzege aspaýy. Muny jai ǵana basqarýshylyq keshigý emes, qoǵamdaǵy áleýmettik turaqtylyqqa tikelei áser etetin faktor retinde qarastyrý kerek", - dedi Jańbyrshin.
Sonymen qatar, depýtat 2022 jyly qysta Ekibastuz qalasynda jylý berý júiesinde iri apattar bolǵanyn, dál sol kezeńde Ridder qalasynda da osyndai jaǵdai qaitalanǵanyn aitty.
"Bul derekter kezdeisoq oqiǵalar emes, jyldar boiy jinaqtalǵan júieli problemalardyń kórinisi ekenin dáleldeidi. Ókinishke qarai, búginde mundai alańdatarlyq belgiler ártúrli aimaqtarda qaitalanyp jatyr. Biylǵy jylytý maýsymynda Aqtaý jáne Temirtaý qalalarynda jylýmen qamtý máseleleri tirkeldi. Árbir osyndai jaǵdai "kommýnaldyq aidahardyń" áli de bolsa tolyq aýyzdyqtalmaǵanyn kórsetedi", - dedi ol.
