Sońǵy eki jylda Balqash kóline shamamen 30 mlrd tekshe metr sý jiberilip, sý deńgeii turaqtandy ári ekojúieniń quldyraý qaýpi azaidy, dep habarlaidy Dalanews.kz.
Bul týraly Ortalyq kommýnikatsiialar qyzmetinde Sý resýrstary jáne irrigatsiia birinshi vitse-ministri Nurlan Aldamjarov málimdedi. Onyń aitýynsha, vedomstvo transshekaralyq ózenderdi ornyqty paidalaný men sý diplomatiiasyn damytý baǵytynda júieli jumys júrgizip keledi.
Reseimen birlesken komissiialar Ertis, Esil, Tobyl jáne Jaiyq basseinderi boiynsha jumys istep jatyr. Sý qoimalarynyń jumys rejimin úilestirý tasqyn qaýpin azaityp, transshekaralyq sýdy turaqty paidalanýǵa múmkindik beredi.
Qytaimen Úlken Ulasty ózeninde ortaq sý bólý nysanyn salý jóninde ýaǵdalastyqqa qol jetkizildi. Sonymen qatar, eki el úkimetteri arasynda transshekaralyq ózender boiynsha sý bólý týraly kelisim jobasy ázirlenýde. Ile ózeni arqyly keletin sý kólemi kópjyldyq ortasha deńgeide saqtalyp, Balqashtyń deńgeii Baltyq júiesi boiynsha 341 metr shamasynda turaqty tur.
Shyǵys Qazaqstandaǵy Buqtyrma sý qoimasynyń tolýy 2023 jylǵy 26 mlrd tekshe metrden 2025 jyly 39 mlrd tekshe metrge jetip, jobalyq kólemniń 25,7 paiyzyna artty.
Ózbekstanmen jańa kelisim nátijesinde sońǵy úsh jylda Soltústik Aralǵa 6 mlrd tekshe metrden astam sý tústi. Sonyń arqasynda teńiz kólemi 18,4 mlrd-tan 23 mlrd tekshe metrge deiin ósti.
Qyrǵyzstanmen Shý-Talas komissiiasy aiasynda 2025 jyly sý berý kestesi bekitilip, Jambyl oblysy diqandarynyń qajettiligi tolyq qamtyldy: Shý arqyly 160 mln, Talas arqyly 427,5 mln tekshe metr sý jetkizildi.
Vitse-ministrdiń aitýynsha, sý diplomatiiasy eldiń sý jáne ekologiialyq qaýipsizdigi úshin strategiialyq mańyzǵa ie. Klimattyń ózgerýi jaǵdaiynda transshekaralyq ózender basseinderinde táýekelderdi azaitý, Balqashty saqtaý jáne Jaiyqtaǵy ekologiialyq ahýaldy jaqsartý negizgi basymdyq bolyp qala beredi.
