Ulytaý oblysy Sátbaev qalasynyń ishki saıasat bólimi memlekettik satyp alý portalynda qyzyq kelisim-shart jasasyp, 78,5 mln teńgege áleýmettik baǵyttaǵy serıal túsirýge tapsyrys bergen. Kelisim tikeleı bir kózden jasalǵan, oryndaýshy – "ErNar-Media" JSHS. Kompanıanyń ıesi depýtat bolyp shyqty, dep habarlaıdy Dalanews.kz ratel.kz-ke siltep.
Jobanyń tehnıkalyq sıpattamasynda tapsyrys berýshi serıaldyń taqyrybyn jemqorlyq, alaıaqtyq jáne otbasylyq qundylyqtardy "nasıhattaý" dep kórsetken. Árıne, shyn máninde ákimdik jemqorlyq pen alaıaqtyqty emes, kerisinshe olarǵa qarsy kúresti nasıhattaýdy kózdegeni anyq.
Jalpy serıal 10 serıadan turýǵa tıis. Ár bólimniń uzaqtyǵy – 15-30 mınýt aralyǵy. Joba aýdıtorıasy retinde jastar, eresekter men aǵa býyn ókilderi atalǵan. Ákimdik serıaldyń tek qazaq tilinde túsirilýin talap etedi. Sonymen qatar, ár bólimde mindetti túrde "Sátbaev qalasy ákimdiginiń tapsyrysy boıynsha" degen jazba bolýy kerek. Tapsyrys berýshi serıal reıtıńi joǵary bolýy úshin kásibı deńgeıdegi akterler men Ulytaý oblysynyń jergilikti ónerpazdaryn qatystyrýdy da talap etken. Jalpy alǵanda serıal túsirilimine kemi 30, eń kóbi 50 akter qatysýǵa tıis.
Shartqa sáıkes, serıaldyń barlyq taqyryby, sújeti men senarıi ákimdikpen tolyqtaı kelisilip, bekitiledi. Oryndaýshy joba aıaqtalǵannan keıin shyǵarmashylyq esep tapsyryp, serıaldyń taralýy týraly BAQ pen blogerlerdiń jazbalaryn da jınap berýi kerek.
"Satyp alý ne sebepti dál osy kompanıamen tikeleı jasalǵany da kórsetilgen. Ákimdik muny "Memlekettik satyp alý týraly" zańnyń 16-babynyń 3-tarmaǵymen túsindiredi. Osy tarmaq boıynsha ıntellektýaldyq menshik obektisi sanalatyn qyzmetti tek osy menshikke eksklúzıvti quqyǵy bar uıymnan satyp alýǵa ruqsat etilgen.
Derekterge súıensek, "ErNar-Media" kompanıasy 2022 jyly qurylǵan. Memlekettik satyp alý naryǵyna 2024 jyly ǵana shyǵyp, birden eki tapsyrys alǵan. Sonyń birin osy Sátbaev ákimdigi bergen (somasy – 30 mln teńge). Ol da jemqorlyq, alaıaqtyq, otbasylyq qundylyqtar men ulttyq tárbıe máselelerin qamtyǵan qysqametrajdy serıal túsirýge arnalǵan. Ekinshi tapsyrys Ulytaý oblysynyń Qoǵamdyq damý basqarmasynan 40 mln teńgege berilgen", - dep jazylǵan basylym dereginde.
Ashyq derekter bazasyna sáıkes, "ErNar-Media" kompanıasynyń basshysy Erkebulan Moldashev – Ulytaý oblysy máslıhatynyń AMANAT partıasynan saılanǵan depýtaty.
YouTube platformasynda "ErNar-Media" kompanıasynyń arnasy bar. Onda kompanıanyń serıaldary men qysqametrajdy fılmderi jarıalanǵan. Vıdeolardyń kóbi myńnan on myń qaralym jınasa, keıbir rolıkterdiń qaralymy 200-300 myńǵa deıin jetken. Fılm ataýlary mynadaı: "Paraqor", "Jedel járdem", "Kontenttiń qurbany", "Lýdoman", "Alıment", "Marafon" jáne "Mahr".
"Árıne, bul memleket esebinen túsirilip jatqan alǵashqy serıal emes. Ári bıliktiń óner men shyǵarmashylyq salasyna aralasyp otyrǵany da jańalyq bolýdan qalǵan. Biraq búdjet qarjysyna túsirilgen, eki aıda jyldam daıyndalǵan, ákimdikke anyq silteme jasalǵan, senarıi shablondy serıal kórermen kóńilinen qanshalyq shyǵady – ol úlken suraq.
Odan da mańyzdysy: bul tapsyrys nelikten dál osy "ErNar-Media" kompanıasyna berildi? Bul kompanıanyń serıal túsirýdegi tájirıbesi qandaı? Onyń ıesi – máslıhat depýtaty Erkebulan Moldashevtiń tapsyrys alýyna saıası laýazymynyń yqpaly boldy ma?!" - dep jazylǵan basylym málimetinde.
