Ulytaý oblysy Sátbaev qalasynyń ishki saiasat bólimi memlekettik satyp alý portalynda qyzyq kelisim-shart jasasyp, 78,5 mln teńgege áleýmettik baǵyttaǵy serial túsirýge tapsyrys bergen. Kelisim tikelei bir kózden jasalǵan, oryndaýshy – "ErNar-Media" JShS. Kompaniianyń iesi depýtat bolyp shyqty, dep habarlaidy Dalanews.kz ratel.kz-ke siltep.
Jobanyń tehnikalyq sipattamasynda tapsyrys berýshi serialdyń taqyrybyn jemqorlyq, alaiaqtyq jáne otbasylyq qundylyqtardy "nasihattaý" dep kórsetken. Árine, shyn máninde ákimdik jemqorlyq pen alaiaqtyqty emes, kerisinshe olarǵa qarsy kúresti nasihattaýdy kózdegeni anyq.
Jalpy serial 10 seriiadan turýǵa tiis. Ár bólimniń uzaqtyǵy – 15-30 minýt aralyǵy. Joba aýditoriiasy retinde jastar, eresekter men aǵa býyn ókilderi atalǵan. Ákimdik serialdyń tek qazaq tilinde túsirilýin talap etedi. Sonymen qatar, ár bólimde mindetti túrde "Sátbaev qalasy ákimdiginiń tapsyrysy boiynsha" degen jazba bolýy kerek. Tapsyrys berýshi serial reitingi joǵary bolýy úshin kásibi deńgeidegi akterler men Ulytaý oblysynyń jergilikti ónerpazdaryn qatystyrýdy da talap etken. Jalpy alǵanda serial túsirilimine kemi 30, eń kóbi 50 akter qatysýǵa tiis.
Shartqa sáikes, serialdyń barlyq taqyryby, siýjeti men stsenariii ákimdikpen tolyqtai kelisilip, bekitiledi. Oryndaýshy joba aiaqtalǵannan keiin shyǵarmashylyq esep tapsyryp, serialdyń taralýy týraly BAQ pen blogerlerdiń jazbalaryn da jinap berýi kerek.
"Satyp alý ne sebepti dál osy kompaniiamen tikelei jasalǵany da kórsetilgen. Ákimdik muny "Memlekettik satyp alý týraly" zańnyń 16-babynyń 3-tarmaǵymen túsindiredi. Osy tarmaq boiynsha intellektýaldyq menshik obektisi sanalatyn qyzmetti tek osy menshikke ekskliýzivti quqyǵy bar uiymnan satyp alýǵa ruqsat etilgen.
Derekterge súiensek, "ErNar-Media" kompaniiasy 2022 jyly qurylǵan. Memlekettik satyp alý naryǵyna 2024 jyly ǵana shyǵyp, birden eki tapsyrys alǵan. Sonyń birin osy Sátbaev ákimdigi bergen (somasy – 30 mln teńge). Ol da jemqorlyq, alaiaqtyq, otbasylyq qundylyqtar men ulttyq tárbie máselelerin qamtyǵan qysqametrajdy serial túsirýge arnalǵan. Ekinshi tapsyrys Ulytaý oblysynyń Qoǵamdyq damý basqarmasynan 40 mln teńgege berilgen", - dep jazylǵan basylym dereginde.
Ashyq derekter bazasyna sáikes, "ErNar-Media" kompaniiasynyń basshysy Erkebulan Moldashev – Ulytaý oblysy máslihatynyń AMANAT partiiasynan sailanǵan depýtaty.
YouTube platformasynda "ErNar-Media" kompaniiasynyń arnasy bar. Onda kompaniianyń serialdary men qysqametrajdy filmderi jariialanǵan. Videolardyń kóbi myńnan on myń qaralym jinasa, keibir rolikterdiń qaralymy 200-300 myńǵa deiin jetken. Film ataýlary mynadai: "Paraqor", "Jedel járdem", "Kontenttiń qurbany", "Lýdoman", "Aliment", "Marafon" jáne "Mahr".
"Árine, bul memleket esebinen túsirilip jatqan alǵashqy serial emes. Ári biliktiń óner men shyǵarmashylyq salasyna aralasyp otyrǵany da jańalyq bolýdan qalǵan. Biraq biýdjet qarjysyna túsirilgen, eki aida jyldam daiyndalǵan, ákimdikke anyq silteme jasalǵan, stsenariii shablondy serial kórermen kóńilinen qanshalyq shyǵady – ol úlken suraq.
Odan da mańyzdysy: bul tapsyrys nelikten dál osy "ErNar-Media" kompaniiasyna berildi? Bul kompaniianyń serial túsirýdegi tájiribesi qandai? Onyń iesi – máslihat depýtaty Erkebulan Moldashevtiń tapsyrys alýyna saiasi laýazymynyń yqpaly boldy ma?!" - dep jazylǵan basylym málimetinde.
