ۇلىتاۋ وبلىسى ساتبايەۆ قالاسىنىڭ ىشكى ساياسات ءبولىمى مەملەكەتتىك ساتىپ الۋ پورتالىندا قىزىق كەلىسىم-شارت جاساسىپ، 78،5 ملن تەڭگەگە الەۋمەتتىك باعىتتاعى سەريال تۇسىرۋگە تاپسىرىس بەرگەن. كەلىسىم تىكەلەي ءبىر كوزدەن جاسالعان، ورىنداۋشى – "ErNar-Media" ج ش س. كومپانيانىڭ يەسى دەپۋتات بولىپ شىقتى، دەپ حابارلايدى Dalanews.kz ratel.kz-كە سىلتەپ.
جوبانىڭ تەحنيكالىق سيپاتتاماسىندا تاپسىرىس بەرۋشى سەريالدىڭ تاقىرىبىن جەمقورلىق، الاياقتىق جانە وتباسىلىق قۇندىلىقتاردى "ناسيحاتتاۋ" دەپ كورسەتكەن. ارينە، شىن مانىندە اكىمدىك جەمقورلىق پەن الاياقتىقتى ەمەس، كەرىسىنشە ولارعا قارسى كۇرەستى ناسيحاتتاۋدى كوزدەگەنى انىق.
جالپى سەريال 10 سەريادان تۇرۋعا ءتيىس. ءار ءبولىمنىڭ ۇزاقتىعى – 15-30 مينۋت ارالىعى. جوبا اۋديتورياسى رەتىندە جاستار، ەرەسەكتەر مەن اعا بۋىن وكىلدەرى اتالعان. اكىمدىك سەريالدىڭ تەك قازاق تىلىندە ءتۇسىرىلۋىن تالاپ ەتەدى. سونىمەن قاتار، ءار بولىمدە مىندەتتى تۇردە "ساتبايەۆ قالاسى اكىمدىگىنىڭ تاپسىرىسى بويىنشا" دەگەن جازبا بولۋى كەرەك. تاپسىرىس بەرۋشى سەريال رەيتينگى جوعارى بولۋى ءۇشىن كاسىبي دەڭگەيدەگى اكتەرلەر مەن ۇلىتاۋ وبلىسىنىڭ جەرگىلىكتى ونەرپازدارىن قاتىستىرۋدى دا تالاپ ەتكەن. جالپى العاندا سەريال تۇسىرىلىمىنە كەمى 30، ەڭ كوبى 50 اكتەر قاتىسۋعا ءتيىس.
شارتقا سايكەس، سەريالدىڭ بارلىق تاقىرىبى، سيۋجەتى مەن سەنارييى اكىمدىكپەن تولىقتاي كەلىسىلىپ، بەكىتىلەدى. ورىنداۋشى جوبا اياقتالعاننان كەيىن شىعارماشىلىق ەسەپ تاپسىرىپ، سەريالدىڭ تارالۋى تۋرالى ب ا ق پەن بلوگەرلەردىڭ جازبالارىن دا جيناپ بەرۋى كەرەك.
"ساتىپ الۋ نە سەبەپتى ءدال وسى كومپانيامەن تىكەلەي جاسالعانى دا كورسەتىلگەن. اكىمدىك مۇنى "مەملەكەتتىك ساتىپ الۋ تۋرالى" زاڭنىڭ 16-بابىنىڭ 3-تارماعىمەن تۇسىندىرەدى. وسى تارماق بويىنشا ينتەللەكتۋالدىق مەنشىك وبەكتىسى سانالاتىن قىزمەتتى تەك وسى مەنشىككە ەكسكليۋزيۆتى قۇقىعى بار ۇيىمنان ساتىپ الۋعا رۇقسات ەتىلگەن.
دەرەكتەرگە سۇيەنسەك، "ErNar-Media" كومپانياسى 2022 جىلى قۇرىلعان. مەملەكەتتىك ساتىپ الۋ نارىعىنا 2024 جىلى عانا شىعىپ، بىردەن ەكى تاپسىرىس العان. سونىڭ ءبىرىن وسى ساتبايەۆ اكىمدىگى بەرگەن (سوماسى – 30 ملن تەڭگە). ول دا جەمقورلىق، الاياقتىق، وتباسىلىق قۇندىلىقتار مەن ۇلتتىق تاربيە ماسەلەلەرىن قامتىعان قىسقامەتراجدى سەريال تۇسىرۋگە ارنالعان. ەكىنشى تاپسىرىس ۇلىتاۋ وبلىسىنىڭ قوعامدىق دامۋ باسقارماسىنان 40 ملن تەڭگەگە بەرىلگەن"، - دەپ جازىلعان باسىلىم دەرەگىندە.
اشىق دەرەكتەر بازاسىنا سايكەس، "ErNar-Media" كومپانياسىنىڭ باسشىسى ەركەبۇلان مولداشيەۆ – ۇلىتاۋ وبلىسى ءماسليحاتىنىڭ AMANAT پارتياسىنان سايلانعان دەپۋتاتى.
YouTube پلاتفورماسىندا "ErNar-Media" كومپانياسىنىڭ ارناسى بار. وندا كومپانيانىڭ سەريالدارى مەن قىسقامەتراجدى فيلمدەرى جاريالانعان. ۆيدەولاردىڭ كوبى مىڭنان ون مىڭ قارالىم جيناسا، كەيبىر روليكتەردىڭ قارالىمى 200-300 مىڭعا دەيىن جەتكەن. فيلم اتاۋلارى مىناداي: "پاراقور"، "جەدەل جاردەم"، "كونتەنتتىڭ قۇربانى"، "لۋدومان"، "اليمەنت"، "مارافون" جانە "ماحر".
"ارينە، بۇل مەملەكەت ەسەبىنەن ءتۇسىرىلىپ جاتقان العاشقى سەريال ەمەس. ءارى بيلىكتىڭ ونەر مەن شىعارماشىلىق سالاسىنا ارالاسىپ وتىرعانى دا جاڭالىق بولۋدان قالعان. ءبىراق بيۋدجەت قارجىسىنا تۇسىرىلگەن، ەكى ايدا جىلدام دايىندالعان، اكىمدىككە انىق سىلتەمە جاسالعان، سەنارييى شابلوندى سەريال كورەرمەن كوڭىلىنەن قانشالىق شىعادى – ول ۇلكەن سۇراق.
ودان دا ماڭىزدىسى: بۇل تاپسىرىس نەلىكتەن ءدال وسى "ErNar-Media" كومپانياسىنا بەرىلدى؟ بۇل كومپانيانىڭ سەريال تۇسىرۋدەگى تاجىريبەسى قانداي؟ ونىڭ يەسى – ءماسليحات دەپۋتاتى ەركەبۇلان مولداشيەۆتىڭ تاپسىرىس الۋىنا ساياسي لاۋازىمىنىڭ ىقپالى بولدى ما؟!" - دەپ جازىلعان باسىلىم مالىمەتىندە.
