Batys Qazaqstan oblysynyń ákimi Nariman Tóreǵaliev Resei Federatsiiasymen shekaralas ornalasqan «Syrym» shekaralyq baqylaý beketine bardy. Ótkizý beketi infraqurylymyn jańǵyrtý maqsatynda qaita qurý jumystary josparlanǵan, dep habarlaidy Dalanews.kz
Óńir basshysy bekettiń qazirgi jai-kúii, jolaýshylar men tasymaldaýshylarǵa jasalǵan jaǵdailarmen jáne qaita jańǵyrtý jobasynyń daiyndyq barysymen tanysty.
Josparǵa sáikes, tehnikalyq baza jańǵyrtylyp, tekserý men kútý aimaqtary keńeitiledi. Sonymen qatar, shekaralyq rásimderdi jedeldetýge baǵyttalǵan birqatar tiimdi sharalar júzege asyrylady.
«Syrym» ótkizý pýnkti Qazaqstan men Resei arasyndaǵy úzdiksiz qozǵalysty qamtamasyz etýde strategiialyq ról atqarady. Jańǵyrtý jumystary shekaradan ótý protsesin jedeldetip, azamattar men kásipkerlerge qolaily ári tiimdi jaǵdailar jasaýǵa múmkindik beredi», – dedi oblys ákimi Nariman Tóreǵaliev.
Aita ketý kerek, «Syrym» shekaralyq beketi – «Batys Eýropa – Batys Qytai» halyqaralyq kólik dálizindegi mańyzdy pýnkt bolyp sanalady. Kólik aǵyny kóp kezeńde bul beket arqyly táýligine 1300-den astam júk kóligi, 800 jeńil kólik ótip, 6000 jolaýshy shekaradan ótedi.
Oblys ákimi Nariman Tóreǵaliev QR UQK BQO boiynsha Shekara qyzmeti departamentine, «QazAvtoJol» ulttyq kompaniiasynyń oblystyq filialyna jáne bas merdigerge naqty tapsyrmalar berdi. Aimaq basshysy jumystardyń naqty josparyn muqiiat pysyqtaýdy, qaita qurý kezinde bekettiń úzdiksiz jumysyn qamtamasyz etýdi, túsindirý jumystaryn júrgizýdi jáne respýblikalyq qurylymdarmen tiimdi ózara is-qimyldy qamtamasyz etýdi tapsyrdy.
