Belgili ekonomist Oljas Qudaibergenov Qazaqstanda azamattardyń jeke derekteri taralýyna bailanysty pikir bildirip, memlekettik organdar otandyq baǵdarlamalyq ónimderdi qoldaný týraly zańdy jappai buzyp otyrǵanyn aitty, dep habarlaidy Dalanews.kz.
Ekonomistiń paiymynsha, tek azamattardyń jeke derekterin emes, basqa da mańyzdy, qupiia aqparatty qorǵaý máselesine jiti mán bergen jón. Ásirese, memlekettik mekemelerdiń qarjylyq aqparatyna erekshe nazar aýdarý qajet. Tek ashyq túrde esep beretin kvazimemlekettik kompaniialardyń derekterin jariialaýǵa bolady, al qalǵan memlekettik mekemelerdiń qarjylyq málimeti syrtqa shyqpaýǵa tiis.
"Árine, biýdjettiń jalpy málimeti ashyq jariialanady, alaida egjei-tegjeili aqparattardy kópshilikke kórsetýge bolmaidy. Erteń jaǵdai qiyndaǵan kezde syrtqy oiynshylar bizdiń ishki aqparatty kóre almaityndai dárejede bolýy kerek. Ókinishke qarai, dál qazir ortalyq jáne jergilikti memlekettik organdar men olardyń enshiles qurylymdary zańdy tikelei buzyp, sheteldik baǵdarlamalyq ónimderdi, ásirese, reseilik 1S sekildi júielerdi jappai qoldanyp otyr. Al negizi zańda mundaiǵa tyiym salynǵan jáne olar mindetti túrde otandyq baǵdarlamalyq ónimderdi qoldanýǵa tiis", – deidi Qudaibergenov.
Ekonomist otandyq baǵdarlamalardy qoldaný mindetin Prezident pen premer-ministrdiń tikelei bekitkenin atap ótti. Arnaiy reestr jasalǵan, memlekettik organdar sol tizimdegi senimdi baǵdarlamalyq ónimderdi ǵana satyp alýǵa tiis edi.
"Ókinishtisi sol, Qazaqstanda bilik vertikali álsiz. Joǵary biliktiń buiryqtary tómendegi mekemelerge jetpei qalady nemese olar muny ashyq túrde elemeidi. Keibir kompaniialar qajetsiz ónimderdi aldap reestrge kirgizedi de, is júzinde basqa, reestrde joq softtardy satyp, zańdy buzady. Jeke sektor qalaǵanyn qoldansyn, al memlekettik sektor mindetti túrde otandyq baǵdarlamalyq ónimderdi qoldanýǵa tiis", – deidi ekonomist.
Qudaibergenovtyń aitýynsha, Antikor, Bas prokýratýra men Qarjy ministrligi biýdjettik mekemelerdi tolyqtai tekserse, óńirlerde biýdjettiń qarjysyna qandai baǵdarlamalyq ónimder satyp alynǵanyn anyqtaityn bolsa, zań buzýdyń óte kóp derekteri shyǵady.
Eske salaiyq, buǵan deiin Qazaqstan azamattarynyń jeke derekteri jappai taralýyna reseilik kompaniialardyń qatysy bar ekeni de aitylǵan edi.
