QR Ulttyq Bank tóraǵasy Tımýr Súleımenov 2025 jylǵy 19 maýsymda Senat dálizinde jýrnalıserge bergen suqbatynda búginderi dollar baǵamynyń nege kúsh alyp jatqanyn túsindirdi. Ol 1 AQSH dollarynyń baǵamy 520 teńgege deıin artýy aıtarlyqtaı kórsetkish ekenin, biraq onyń osyǵan deıin qaı deńgeıge deıin baryp, qaıta keri ketken kezine de kóz júgirtýge keńes beredi, dep habarlaıdy Dalanews.kz.

"Sońǵy kúnderi qor bırjasynda saýda-sattyq 515-517 teńge deńgeıinde jabylyp júrdi. Absolútti jáne paıyzdyq sıpatta jalpy bul kóp kórsetkish emes. Buǵan yqpal etýshi negizgi faktorlar - demalys maýsymynyń bastalýy. Ózderińiz biletindeı, bizde jazda jeke tulǵalar tarapynan shetel valútasyna degen suranys artady, ádette maýsym aıynda dollarǵa, belgili bir dárejede eýroǵa da. Bul - birinshiden", - dedi Tımýr Súleımenov.

Ekinshi mańyzdy faktor – búdjettik jáne kvazımemlekettik baǵdarlamalardy iske asyryla bastalýy.

"Ózderińiz biletindeı, búdjettik rásimder men memlekettik satyp alý rásimderine baılanysty búdjetten bólinetin aqsha  búdjet ákimshilerine, ıaǵnı olardy is júzinde jumsaıtyndardyń qolyna maýsym aıynda tıedi.  Tıisinshe, qazir ınvestısıalyq jobalardy iske asyrýdyń belsendi kezeńi bastaldy. Olardyń kópshiligi jabdyqtar, qosalqy bólshekter jáne t.b. ımport taýarlar ala bastaıdy, sondyqtan biz saýda-sattyq deńgeıiniń joǵarylaýynyń kýási bolamyz. Sońǵy birneshe kúnde saýda-sattyq kólemi aıtarlyqtaı ósti. Eger ótken aptada ortasha táýliktik kólem 240-250 mln bolsa, osy aptada – 300-330 mıllıonnan astam boldy", - dedi Tımýr Súleımenov.

Sondaı-aq ol Ulttyq Bank baǵamnyń odan ári arttatyndaı sebepter baıqamaıtynyn da atap ótti.

"Árıne, biz boljam bere almaımyz, biraq bul rette men eki negizgi faktordy ataı ketkim keledi. Basqa makroekonomıkalyq faktorlar turǵysynan, ishki ekonomıkada bári turaqty, ekonomıka ósýde. Syrtqy faktorlarǵa qatysty qazir eshkim boljam jasaı almaıdy. Iran men Izraıl arasyndaǵy shıelenis aıasynda munaı baǵasynyń ósýi jáne Ormýz buǵazy arqyly jetkizilimge qaýip tónýi oń faktor bolyp tabylady. Qazir Brent markaly munaıdyń bir barreli shamamen 77 dollar bolady. Bul baǵanyń qansha ýaqytqa sozylatynyn eshkim bilmeıdi. Biraq qazirgi ýaqytta bul biz úshin ońtaıly, óıtkeni Qazaqstan – eksporttaýshy el. Sondyqtan biz shetel valútasy baǵamynyń kúrt ósimine yqpal etýshi  alǵysharttardy kórip otyrǵan joqpyz", - dep túsindirdi Tımýr Súleımenov.

Aıta ketsek, kúni keshe aqsha aıyrbas oryndarynda 1 evro 605 teńgeden satylyp jatqanyn, dollarmen qatar eýro baǵamy da kúsh alýda ekenin jazǵanbyz.