ق ر ۇلتتىق بانك ءتوراعاسى تيمۋر سۇلەيمەنوۆ 2025 جىلعى 19 ماۋسىمدا سەنات دالىزىندە جۋرناليستەرگە بەرگەن سۇقباتىندا بۇگىندەرى دوللار باعامىنىڭ نەگە كۇش الىپ جاتقانىن ءتۇسىندىردى. ول 1 اقش دوللارىنىڭ باعامى 520 تەڭگەگە دەيىن ارتۋى ايتارلىقتاي كورسەتكىش ەكەنىن، ءبىراق ونىڭ وسىعان دەيىن قاي دەڭگەيگە دەيىن بارىپ، قايتا كەرى كەتكەن كەزىنە دە كوز جۇگىرتۋگە كەڭەس بەرەدى، دەپ حابارلايدى Dalanews.kz.
"سوڭعى كۇندەرى قور بيرجاسىندا ساۋدا-ساتتىق 515-517 تەڭگە دەڭگەيىندە جابىلىپ ءجۇردى. ءابسوليۋتتى جانە پايىزدىق سيپاتتا جالپى بۇل كوپ كورسەتكىش ەمەس. بۇعان ىقپال ەتۋشى نەگىزگى فاكتورلار - دەمالىس ماۋسىمىنىڭ باستالۋى. وزدەرىڭىز بىلەتىندەي، بىزدە جازدا جەكە تۇلعالار تاراپىنان شەتەل ۆاليۋتاسىنا دەگەن سۇرانىس ارتادى، ادەتتە ماۋسىم ايىندا دوللارعا، بەلگىلى ءبىر دارەجەدە ەۋروعا دا. بۇل - ءبىرىنشىدەن"، - دەدى تيمۋر سۇلەيمەنوۆ.
ەكىنشى ماڭىزدى فاكتور – بيۋدجەتتىك جانە كۆازيمەملەكەتتىك باعدارلامالاردى ىسكە اسىرىلا باستالۋى.
"وزدەرىڭىز بىلەتىندەي، بيۋدجەتتىك راسىمدەر مەن مەملەكەتتىك ساتىپ الۋ راسىمدەرىنە بايلانىستى بيۋدجەتتەن بولىنەتىن اقشا بيۋدجەت اكىمشىلەرىنە، ياعني ولاردى ءىس جۇزىندە جۇمسايتىنداردىڭ قولىنا ماۋسىم ايىندا تيەدى. تيىسىنشە، ءقازىر ينۆەستيسيالىق جوبالاردى ىسكە اسىرۋدىڭ بەلسەندى كەزەڭى باستالدى. ولاردىڭ كوپشىلىگى جابدىقتار، قوسالقى بولشەكتەر جانە ت.ب. يمپورت تاۋارلار الا باستايدى، سوندىقتان ءبىز ساۋدا-ساتتىق دەڭگەيىنىڭ جوعارىلاۋىنىڭ كۋاسى بولامىز. سوڭعى بىرنەشە كۇندە ساۋدا-ساتتىق كولەمى ايتارلىقتاي ءوستى. ەگەر وتكەن اپتادا ورتاشا تاۋلىكتىك كولەم 240-250 ملن بولسا، وسى اپتادا – 300-330 ميلليوننان استام بولدى"، - دەدى تيمۋر سۇلەيمەنوۆ.
سونداي-اق ول ۇلتتىق بانك باعامنىڭ ودان ءارى ارتتاتىنداي سەبەپتەر بايقامايتىنىن دا اتاپ ءوتتى.
"ارينە، ءبىز بولجام بەرە المايمىز، ءبىراق بۇل رەتتە مەن ەكى نەگىزگى فاكتوردى اتاي كەتكىم كەلەدى. باسقا ماكروەكونوميكالىق فاكتورلار تۇرعىسىنان، ىشكى ەكونوميكادا ءبارى تۇراقتى، ەكونوميكا وسۋدە. سىرتقى فاكتورلارعا قاتىستى ءقازىر ەشكىم بولجام جاساي المايدى. يران مەن يزرايل اراسىنداعى شيەلەنىس اياسىندا مۇناي باعاسىنىڭ ءوسۋى جانە ورمۋز بۇعازى ارقىلى جەتكىزىلىمگە ءقاۋىپ ءتونۋى وڭ فاكتور بولىپ تابىلادى. ءقازىر Brent ماركالى مۇنايدىڭ ءبىر باررەلى شامامەن 77 دوللار بولادى. بۇل باعانىڭ قانشا ۋاقىتقا سوزىلاتىنىن ەشكىم بىلمەيدى. ءبىراق قازىرگى ۋاقىتتا بۇل ءبىز ءۇشىن وڭتايلى، ويتكەنى قازاقستان – ەكسپورتتاۋشى ەل. سوندىقتان ءبىز شەتەل ۆاليۋتاسى باعامىنىڭ كۇرت وسىمىنە ىقپال ەتۋشى العىشارتتاردى كورىپ وتىرعان جوقپىز"، - دەپ ءتۇسىندىردى تيمۋر سۇلەيمەنوۆ.
ايتا كەتسەك، كۇنى كەشە اقشا ايىرباس ورىندارىندا 1 ەۆرو 605 تەڭگەدەن ساتىلىپ جاتقانىن، دوللارمەن قاتار ەۋرو باعامى دا كۇش الۋدا ەكەنىن جازعانبىز.
