Qazaqstan aýyldaryn internetpen qamtamasyz etý máselesi boiynsha ótken jiynda senator Olga Býlavkina Reseimen shekaralas aimaqtarda turatyn turǵyndardyń tek Resei telearnalaryn kóretinin aityp, dabyl qaqty, dep habarlaidy Dalanews.kz.
Senatordyń aitýynsha, Qazaqstanda internet pen otandyq telearnaǵa qoljetimdiligi joq aýyldar bar, al ondaǵy halyq kóretin jalǵyz aqparat kózi – Reseidiń telearnalary.
"Bul aýyldar kórshiles memlekettiń telebaǵdarlamasyn kóredi. Demek, olar sińiretin ideologiia da – sol eldiń ideologiiasy. Nátijesinde balalaryn da sol elge oqýǵa jiberedi. Bul máseleni qalai sheshpeksizder?" – dedi Býlavkina.
Ol bul problema Borodýliha aýdanyndaǵy aýyldarǵa tán ekenin aityp, jyldar boiy sheshilmei kele jatqanyn qadap aitty.
Senatordyń suraǵyna jaýap bergen Tsifrlyq damý, innovatsiialar jáne aeroǵarysh ónerkásibi ministrliginiń Telekommýnikatsiia komiteti tóraǵasynyń orynbasary Oljas Qabenov másele tele-radio habarlaryn taratý emes, mádeniet jáne aqparat ministrligine qaraitynyn aitty.
"Búginde bizdiń spýtnik arqyly Qazaqstannyń búkil aýmaǵy 100% qamtylǵan. Televiziiany qabyldaý úshin turǵyndar tek qajetti qabyldaǵysh quralyn ornatýy kerek. Qazaqstandyq 20-dan astam arnadan turatyn standartty toptama tegin kórsetiledi, qosymsha aqyly arnalardy da qosýǵa bolady", – dedi Qabenov.
Onyń aitýynsha, internetpen qamtý jumystary jalǵasyp jatyr. Aýyldarǵa internet jetkizý baǵytynda birneshe joba iske asyrylyp jatqanyn málimdedi.
