قازاقستان اۋىلدارىن ينتەرنەتپەن قامتاماسىز ەتۋ ماسەلەسى بويىنشا وتكەن جيىندا سەناتور ولگا بۋلاۆكينا رەسەيمەن شەكارالاس ايماقتاردا تۇراتىن تۇرعىنداردىڭ تەك رەسەي تەلەارنالارىن كورەتىنىن ايتىپ، دابىل قاقتى، دەپ حابارلايدى Dalanews.kz.
سەناتوردىڭ ايتۋىنشا، قازاقستاندا ينتەرنەت پەن وتاندىق تەلەارناعا قولجەتىمدىلىگى جوق اۋىلدار بار، ال ونداعى حالىق كورەتىن جالعىز اقپارات كوزى – رەسەيدىڭ تەلەارنالارى.
"بۇل اۋىلدار كورشىلەس مەملەكەتتىڭ تەلەباعدارلاماسىن كورەدى. دەمەك، ولار سىڭىرەتىن يدەولوگيا دا – سول ەلدىڭ يدەولوگياسى. ناتيجەسىندە بالالارىن دا سول ەلگە وقۋعا جىبەرەدى. بۇل ماسەلەنى قالاي شەشپەكسىزدەر؟" – دەدى بۋلاۆكينا.
ول بۇل پروبلەما بورودۋليحا اۋدانىنداعى اۋىلدارعا ءتان ەكەنىن ايتىپ، جىلدار بويى شەشىلمەي كەلە جاتقانىن قاداپ ايتتى.
سەناتوردىڭ سۇراعىنا جاۋاپ بەرگەن سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ تەلەكوممۋنيكاسيا كوميتەتى ءتوراعاسىنىڭ ورىنباسارى ولجاس قابەنوۆ ماسەلە تەلە-راديو حابارلارىن تاراتۋ ەمەس، مادەنيەت جانە اقپارات مينيسترلىگىنە قارايتىنىن ايتتى.
"بۇگىندە ءبىزدىڭ سپۋتنيك ارقىلى قازاقستاننىڭ بۇكىل اۋماعى 100% قامتىلعان. تەليەۆيزيانى قابىلداۋ ءۇشىن تۇرعىندار تەك قاجەتتى قابىلداعىش قۇرالىن ورناتۋى كەرەك. قازاقستاندىق 20-دان استام ارنادان تۇراتىن ستاندارتتى توپتاما تەگىن كورسەتىلەدى، قوسىمشا اقىلى ارنالاردى دا قوسۋعا بولادى"، – دەدى قابەنوۆ.
ونىڭ ايتۋىنشا، ينتەرنەتپەن قامتۋ جۇمىستارى جالعاسىپ جاتىر. اۋىلدارعا ينتەرنەت جەتكىزۋ باعىتىندا بىرنەشە جوبا ىسكە اسىرىلىپ جاتقانىن مالىمدەدى.
