Búgin Reseı Federasıasynyń Amýr oblysynda bortynda 43 jolaýshy bolǵan An-24 jolaýshylar ushaǵy radardan joǵalyp ketti. Kóp uzamaı onyń apatqa ushyraǵany belgili boldy, dep habarlaıdy Dalanews.kz.
"Angara" áýe kompanıasyna tıesili, Habarovsk – Blagoveshensk – Tynda baǵytyna qatynaıtyn jolaýshylar ushaǵymen Amýr oblysyna kelgende, ıaǵnı Tynda qalasynyń áýejaıyna birneshe shaqyrym qalǵanda baılanys úzilgen.
"Aldyn ala málimetter boıynsha, ushaq bortynda 43 jolaýshy (onyń ishinde bes bala) jáne alty ekıpaj múshesi bolǵan. Ushaqty izdeýge barlyq qajetti kúshter men quraldar jumyldyrylǵan. An-24 aýada qandaı da bir qaýip týraly belgi bermegen", dep jazady TASS.
Ushaq Tynda áýejaıyna qoný úshin ekinshi ret aınalyp kelýge ketkende radardan joǵalǵan. İzdeý jumystary barysynda An-24-tiń janyp jatqan qaldyqtary atalǵan qaladan 16 shaqyrym qashyqtyqta taýdyń baýraıynan tabyldy. Aldyn ala málimetter boıynsha, borttaǵy barlyq adam qaza tapqan.
"Aldyn ala boljam boıynsha, aýa-raıynyń qolaısyzdyǵyna baılanysty qonýǵa jaqyndaǵanda taý basyndaǵy úshkir tasty ilip ketken ekıpajdyń qateligi týraly aıtylady. Basqa nusqalar da qarastyrylyp, tekserilýde", - deıdi TASS derekkózi.
