QR Kólik mınıstri Túrkistan oblysynyń turǵyndarymen kezdesý ótkizip, azamattardy jeke qabyldady, dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
Jıyn barysynda Marat Qarabaev ótken jyly halyqpen kezdesýde kóterilgen máselelerdiń oryndalý barysy týraly aqparatpen bólisti. Máselen, «Túrkistan-Saryaǵash» baǵytyndaǵy temirjol qatynasy qalpyna keltirildi. Jalpy uzyndyǵy 64 shaqyrymdy quraıtyn respýblıkalyq mańyzy bar «Sháýildir-Túrkistan» tas jolyn qaıta jańǵyrtý jumystary jalǵasýda, onyń 32 shaqyrymynda jumystar aıaqtalǵan. Sondaı-aq, Túrkistan (30 shaqyrym) jáne Saryaǵash (160 shaqyrym) qalalarynyń aınalma joldaryn salýǵa tıisti vedomstvo tarapynan qarajat qarastyrylǵan. Jumys 2025 jyly bastalady.
Sondaı-aq, mınıstrdiń usynysyna sáıkes Túrkistan oblysy ákimdiginiń jolaýshylar kóligi jáne avtomobıl joldary basqarmasynyń «Ońtústik joldary» memlekettik komýnaldyq kásiporny qyzmetkerleriniń jalaqysy kóterildi. Osylaısha, 2024 jyldyń 1 qańtarynan bastap jalaqy 15 paıyzǵa ósti. Qyzmetkerlerdiń eńbek jaǵdaıyn jaqsartý jumystary jalǵasýda.
Búgingi kezdesý barysynda óńir turǵyndary Astana jáne Almaty qalalaryna áýe reısteriniń sanyn ulǵaıtý, sondaı-aq «Túrkistan-Qaraǵandy» baǵyty boıynsha áýe reısterin ashýdy, «Túrkistan-Samarqand» halyqaralyq áýe reısin qalpyna keltirý jáne «Túrkistan-SHymkent» temirjol qatynasyn Lengir stansıasyna deıin uzartý máselesin kóterdi. Mınıstrlik bul usynystardy quzyrly memlekettik organdarmen jáne áýe kompanıalarymen birlesip jedel qarastyryp, qajetti jumystar júrgizedi.
Marat Qarabaev oblys halqymen kezdesýden keıin óńir azamattaryn jeke qabyldady. Onda uzyndyǵy 55 shaqyrym bolatyn «Túrkistan-Ashysaı» tas jolyn jóndeý jáne Hanqorǵan aýyldyq okrýgindegi jergilikti mańyzy bar joldy jóndeýge qatysty saýaldar boldy. Barlyq ótinishter baqylaýǵa alynyp, mınıstrliktiń jaýapty qyzmetkerlerine tıisti tapsyrmalar berildi.
