"Rosatom" baspasóz qyzmeti London salǵan sanksıalarǵa qatysty túsinikteme berdi, dep habarlaıdy Dalanews.kz.

"Rosatom" kez kelgen birjaqty shekteýlerdi halyqaralyq quqyq turǵysynan zańsyz dep esepteıdi. Beıbit atom salasyndaǵy yntymaqtastyqtyń basym baǵyty – qaýipsizdik, al mundaı sharalar osy negizgi qaǵıdatqa keri áserin tıgizedi.

"Rosatom" atom energetıkasy salasyndaǵy sózsiz álemdik kóshbasshy bolyp tabylady jáne jekelegen memleketterdiń birjaqty ári legıtımdi emes sheshimderi bul mártebege nuqsan keltire almaıdy. Memlekettik korporasıa sheteldegi barlyq jobalary boıynsha mindettemelerin oryndaýdy jalǵastyrýda: biz shetelde atom elektr stansıalaryn salý boıynsha álemde birinshi oryndamyz, naryqtaǵy úlesimiz – 90%. Sondaı-aq ıadrolyq otyn ónimderi naryǵynyń negizgi qatysýshysymyz. Biz seriktestermen birlesip ıadrolyq medısına jáne basqa da joǵary tehnologıalyq salalarda jobalardy iske asyrýdamyz, 60-tan astam elmen yntymaqtastyq ornatqanbyz jáne olar úshin senimdi áriptes bolyp qala beremiz", - deıdi kompanıa ókilderi. 

Eske salaıyq,Qazaqstandaǵy AES jobasyna jaýapty «Rosatom» bólimshelerine sanksıa salynǵan bolatyn. 

Ulybrıtanıa Reseıdiń memlekettik «Rosatom» konserniniń azamattyq baǵyttaǵy úsh enshiles kompanıasyna atom salasyndaǵy halyqaralyq jobalar portfelin keńeıtýge qatysy bar degen sebeppen sanksıa engizdi.