Qazaqstandyq ǵalymdar salqyndatylǵan qus etiniń saqtaý merzimin nitrattar men nitritterdi qoldanbai, 0±1 °C temperatýrada 20 táýlikke deiin, iaǵni shamamen úsh esege arttyrýǵa múmkindik beretin innovatsiialyq tehnologiiany usyndy. Bul sheshim ishki naryqty damytýǵa jáne salanyń eksporttyq áleýetin keńeitýge jol ashady, dep habarlaidy Dalanews.kz.
Ázirleme Qazaq qaita óńdeý jáne taǵam ónerkásibi ǵylymi-zertteý institýty mamandaryna tiesili. Atalǵan institýt Ulttyq agrarlyq ǵylymi-bilim berý ortalyǵy (UAǴBO) qurylymyna kiredi.
Innovatsiianyń negizin sút sarysýy men Lactococcus lactis ssp. lactis F-116 gibridti shtamynyń bakteriotsini negizinde jasalǵan antimikrobtyq taǵamdyq jabyn quraidy. Ázirlengen biokonservant Pseudomonas, Salmonella jáne Listeria sekildi negizgi patogenderdiń damýyn tejeidi. Sonymen qatar, onyń quramynda ýly himiialyq qospalar joq jáne ol «Clean Label» halyqaralyq tujyrymdamasyna sai keledi.
Bul jabyndy qoldaný salqyndatylǵan shikizattyń mikrobiologiialyq buzylýyn edáýir baiaýlatyp, uzaq ýaqyt boiy sapasyn saqtaýǵa múmkindik beredi.
FAO derekterine sáikes, 2030 jylǵa qarai qus eti álemdik et naryǵynyń shamamen 41%-yn quraidy. Mundai jaǵdaida salqyndatylǵan ónimniń saqtaý merzimin uzartý básekege qabilettiliktiń strategiialyq mańyzdy faktoryna ainalmaq.
Saqtaý merzimin 20 táýlikke deiin uzartý jetkizý logistikasynyń aýqymyn keńeitip, ónimniń buzylýynan bolatyn shyǵyndardy azaitady, salqyndatylǵan et eksportyn ulǵaityp, ónimniń qosylǵan qunyn arttyrady.
2023–2025 jyldary júrgizilgen zertteýler aiasynda ǵalymdar qus etiniń krioskopiialyq jáne shekti salqyndatý temperatýralaryn anyqtady, qabyqsha túzýshi quramnyń ońtaily kontsentratsiiasyn negizdep, ushalardy óńdeý boiynsha usynymdar ázirledi, uzaq merzimdi saqtaý kezinde organoleptikalyq kórsetkishterdiń saqtalatynyn dáleldedi jáne jabyndy jaǵý boiynsha tehnologiialyq nusqaýlyq daiyndady.
Tehnologiia óndiristik synaqtan ótip, «Medeý 55» áleýmettik kásipkerlik korporatsiiasyna engizildi.
Ázirleme otandyq mikroorganizm shtamdary men sút sarysýyn paidalanýǵa negizdelgen. Bul aýyl sharýashylyǵy shikizatyn tereń óńdeýge jáne importtyq taǵamdyq qospalarǵa táýeldilikti azaitýǵa yqpal etedi.
Tehnologiia aýqymdy deńgeide qoldanýǵa daiyn ári qazaqstandyq et ónimderiniń ishki jáne syrtqy naryqtardaǵy básekege qabilettiligin arttyrýdyń tiimdi quraly bola alady.
