قازاقستاندىق عالىمدار سالقىنداتىلعان قۇس ەتىنىڭ ساقتاۋ مەرزىمىن نيتراتتار مەن نيتريتتەردى قولدانباي، 0±1 °C تەمپەراتۋرادا 20 تاۋلىككە دەيىن، ياعني شامامەن ءۇش ەسەگە ارتتىرۋعا مۇمكىندىك بەرەتىن يننوۆاسيالىق تەحنولوگيانى ۇسىندى. بۇل شەشىم ىشكى نارىقتى دامىتۋعا جانە سالانىڭ ەكسپورتتىق الەۋەتىن كەڭەيتۋگە جول اشادى، دەپ حابارلايدى Dalanews.kz.

ازىرلەمە قازاق قايتا وڭدەۋ جانە تاعام ونەركاسىبى عىلىمي-زەرتتەۋ ينستيتۋتى ماماندارىنا تيەسىلى. اتالعان ينستيتۋت ۇلتتىق اگرارلىق ءعىلىمي-بىلىم بەرۋ ورتالىعى (ۇاعبو) قۇرىلىمىنا كىرەدى.

يننوۆاسيانىڭ نەگىزىن ءسۇت سارىسۋى مەن Lactococcus lactis ssp. lactis F-116 گيبريدتى شتامىنىڭ باكتەريوسينى نەگىزىندە جاسالعان انتيميكروبتىق تاعامدىق جابىن قۇرايدى. ازىرلەنگەن بيوكونسەرۆانت Pseudomonas، Salmonella جانە Listeria سەكىلدى نەگىزگى پاتوگەندەردىڭ دامۋىن تەجەيدى. سونىمەن قاتار، ونىڭ قۇرامىندا ۋلى حيميالىق قوسپالار جوق جانە ول «Clean Label» حالىقارالىق تۇجىرىمداماسىنا ساي كەلەدى.

بۇل جابىندى قولدانۋ سالقىنداتىلعان شيكىزاتتىڭ ميكروبيولوگيالىق بۇزىلۋىن ەداۋىر باياۋلاتىپ، ۇزاق ۋاقىت بويى ساپاسىن ساقتاۋعا مۇمكىندىك بەرەدى.

FAO دەرەكتەرىنە سايكەس، 2030 جىلعا قاراي قۇس ەتى الەمدىك ەت نارىعىنىڭ شامامەن 41%-ىن قۇرايدى. مۇنداي جاعدايدا سالقىنداتىلعان ءونىمنىڭ ساقتاۋ مەرزىمىن ۇزارتۋ باسەكەگە قابىلەتتىلىكتىڭ ستراتەگيالىق ماڭىزدى فاكتورىنا اينالماق.

ساقتاۋ مەرزىمىن 20 تاۋلىككە دەيىن ۇزارتۋ جەتكىزۋ لوگيستيكاسىنىڭ اۋقىمىن كەڭەيتىپ، ءونىمنىڭ بۇزىلۋىنان بولاتىن شىعىنداردى ازايتادى، سالقىنداتىلعان ەت ەكسپورتىن ۇلعايتىپ، ءونىمنىڭ قوسىلعان قۇنىن ارتتىرادى.

2023–2025 جىلدارى جۇرگىزىلگەن زەرتتەۋلەر اياسىندا عالىمدار قۇس ەتىنىڭ كريوسكوپيالىق جانە شەكتى سالقىنداتۋ تەمپەراتۋرالارىن انىقتادى، قابىقشا ءتۇزۋشى قۇرامنىڭ وڭتايلى كونسەنتراسياسىن نەگىزدەپ، ۇشالاردى وڭدەۋ بويىنشا ۇسىنىمدار ازىرلەدى، ۇزاق مەرزىمدى ساقتاۋ كەزىندە ورگانولەپتيكالىق كورسەتكىشتەردىڭ ساقتالاتىنىن دالەلدەدى جانە جابىندى جاعۋ بويىنشا تەحنولوگيالىق نۇسقاۋلىق دايىندادى.

تەحنولوگيا وندىرىستىك سىناقتان ءوتىپ، «مەدەۋ 55» الەۋمەتتىك كاسىپكەرلىك كورپوراسياسىنا ەنگىزىلدى.
ازىرلەمە وتاندىق ميكروورگانيزم شتامدارى مەن ءسۇت سارىسۋىن پايدالانۋعا نەگىزدەلگەن. بۇل اۋىل شارۋاشىلىعى شيكىزاتىن تەرەڭ وڭدەۋگە جانە يمپورتتىق تاعامدىق قوسپالارعا تاۋەلدىلىكتى ازايتۋعا ىقپال ەتەدى.

تەحنولوگيا اۋقىمدى دەڭگەيدە قولدانۋعا دايىن ءارى قازاقستاندىق ەت ونىمدەرىنىڭ ىشكى جانە سىرتقى نارىقتارداعى باسەكەگە قابىلەتتىلىگىن ارتتىرۋدىڭ ءتيىمدى قۇرالى بولا الادى.