Qostanai turǵyny Serik Maldybaev jol politsiiasy qyzmetkerleri ózin ádeii quqyqbuzýshylyq jasaýǵa itermeledi dep málimdedi, dep habarlaidy Dalanews.kz.
Oqiǵa kópqabatty úidiń aýlasynda bastalǵan. Kórshilerdiń shaǵymynan keiin kelgen patrýl qyzmetkerleri durys qoiylmaǵan kóliktiń iesin shaqyryp, ákimshilik hattama toltyrǵan. Keiin inspektorlar júrgizýshiden kólikti basqa orynǵa jyljytýdy talap etken.
Maldybaev qaryn tazalap, politseilerdiń talabyn oryndap, kólikti jyljytady. Sol sátte inspektorlardyń biri odan meditsinalyq kýálandyrýdan ótýdi suraǵan. Sebebi er adamnan alkogoldiń álsiz iisi shyqqany aitylǵan.
Saraptama onyń jeńil dárejede mas bolǵanyn kórsetken. Osydan keiin Maldybaevqa taǵy bir hattama toltyrylyp, is sotqa joldanǵan. Sot sheshimimen ol 15 táýlikke qamaýǵa alynyp, 7 jylǵa júrgizýshi kýáliginen aiyrylǵan.
Qostanailyq bes táýlik qamaýda otyryp, apelliatsiialyq shaǵymy qaralǵanǵa deiin ýaqytsha bosatylǵan.
Sotta Maldybaev pen onyń advokaty muny ádeii jasalǵan arandatý dep otyr. Olardyń aitýynsha, inspektorlar er adamnyń mas ekenin aldyn ala bilgen. Maldybaevtyń ózi úiinde otyryp bir bótelke syra ishkenin, eshqaida shyqpaq bolmaǵanyn aitady.
"Meni kólikti 20 metr júrgizýge politseiler májbúr etti. Olar taǵy bir ret jazalaý úshin ádeii osylai jasady. Maǵan basqa tańdaý qaldyrmad", - deidi ol.
Bul ustanymdy prokýror da ishinara qoldaǵan. Oqiǵa ornyndaǵy beinejazbany zerttegen ol Maldybaev kólikti qozǵamas buryn tórt minýt boiy qyzdyrǵanyn, al politseiler osy ýaqyt boiy baqylap turǵanyn atap ótken.
Al inspektorlar sotta ózderine taǵylǵan aiypty joqqa shyǵardy. Olardyń sózinshe, júrgizýshini eshkim kúshpen rólge otyrǵyzbaǵan. Eger Maldybaev kólikti ózderi jyljytyp berýdi surasa, kómektesýge daiyn bolǵandaryn aitty. Sondai-aq olar quqyqbuzýshylyqtyń aldyn alý emes, ony tirkeý - negizgi mindetimiz dep málimdegen.
Is boiynsha sot protsesi jalǵasyp jatyr.
