Almatyda elektrondy temekilerge tolyq tyiym salynǵanyna qaramastan, veipterdiń zańsyz saýdasy áshkerelendi, dep habarlaidy Dala news.
Qala prokýratýrasynyń úilestirýimen Ekonomikalyq tergep-tekserý departamenti kezekti qylmystyq isti aiaqtady. Tergeý barysynda tyiym salynǵan ónim Telegram messendjeri men áleýmettik jeliler arqyly jasyryn satylǵany anyqtalǵan.
Negizgi satý arnalary retinde «ESCOBAR OPTOM», «Snake opt» jáne ózge de Telegram-arnalar qoldanylǵan. Ónim qoimalar men jasyryn oryndarda saqtalǵan.
Tergeý nátijesinde 180 myńnan astam veip tárkilenip, joiyldy. Sarapshylardyń baǵalaýynsha, olardyń zańsyz satylymynan túsýi múmkin tabys 1 mlrd teńgeden asýy yqtimal bolǵan.
Sondai-aq qoimalar men ótkizý núkteleri anyqtalyp, kúdiktilerdiń 347 mln teńge kólemindegi múlkine tyiym salyndy. Is boiynsha alty adam jaýapkershilikke tartylyp, qylmystyq is sotqa joldandy.
Prokýratýra 2024 jyldyń maýsymynan bastap Qazaqstanda elektrondy temekilerdi, olarǵa arnalǵan suiyqtyqtar men hosh iistendirgishterdi ákelýge, óndirýge, satýǵa jáne taratýǵa tyiym salynǵanyn eske saldy. Zańsyz ainalym úshin qylmystyq jaýapkershilik, sonyń ishinde bas bostandyǵynan aiyrý jazasy qarastyrylǵan.
