الماتىدا ەلەكتروندى تەمەكىلەرگە تولىق تىيىم سالىنعانىنا قاراماستان، ۆەيپتەردىڭ زاڭسىز ساۋداسى اشكەرەلەندى، دەپ حابارلايدى Dala news.
قالا پروكۋراتۋراسىنىڭ ۇيلەستىرۋىمەن ەكونوميكالىق تەرگەپ-تەكسەرۋ دەپارتامەنتى كەزەكتى قىلمىستىق ءىستى اياقتادى. تەرگەۋ بارىسىندا تىيىم سالىنعان ءونىم Telegram مەسسەندجەرى مەن الەۋمەتتىك جەلىلەر ارقىلى جاسىرىن ساتىلعانى انىقتالعان.
نەگىزگى ساتۋ ارنالارى رەتىندە «ESCOBAR OPTOM»، «Snake opt» جانە وزگە دە Telegram-ارنالار قولدانىلعان. ءونىم قويمالار مەن جاسىرىن ورىنداردا ساقتالعان.
تەرگەۋ ناتيجەسىندە 180 مىڭنان استام ۆەيپ تاركىلەنىپ، جويىلدى. ساراپشىلاردىڭ باعالاۋىنشا، ولاردىڭ زاڭسىز ساتىلىمىنان ءتۇسۋى مۇمكىن تابىس 1 ملرد تەڭگەدەن اسۋى ىقتيمال بولعان.
سونداي-اق قويمالار مەن وتكىزۋ نۇكتەلەرى انىقتالىپ، كۇدىكتىلەردىڭ 347 ملن تەڭگە كولەمىندەگى مۇلكىنە تىيىم سالىندى. ءىس بويىنشا التى ادام جاۋاپكەرشىلىككە تارتىلىپ، قىلمىستىق ءىس سوتقا جولداندى.
پروكۋراتۋرا 2024 جىلدىڭ ماۋسىمىنان باستاپ قازاقستاندا ەلەكتروندى تەمەكىلەردى، ولارعا ارنالعان سۇيىقتىقتار مەن حوش يىستەندىرگىشتەردى اكەلۋگە، وندىرۋگە، ساتۋعا جانە تاراتۋعا تىيىم سالىنعانىن ەسكە سالدى. زاڭسىز اينالىم ءۇشىن قىلمىستىق جاۋاپكەرشىلىك، سونىڭ ىشىندە باس بوستاندىعىنان ايىرۋ جازاسى قاراستىرىلعان.
