2025 jyly Global Passport Power Rank reıtıńisi boıynsha álemdegi "eń myqty" pasporttar tiziminde Qazaqstan 95 eldiń arasynda 52-orynǵa jaıǵasty, dep habarlaıdy Dalanews.kz.

Bir jyl buryn elimiz 54-orynda tóbe kórsetken edi.

Qazirgi tańda Qazaqstan azamattary vızasyz 46 elge saıahattaı alady, al taǵy 50 memlekette vızany shekaradan ótken kezde rásimdeýge múmkindik bar.

Sonymen birge 102 elge barý úshin qujattardy aldyn ala rásimdeý qajet. Osylaısha, qazaqstandyq pasporttyń mobıldilik kórsetkishi 95 baldy qurady.

Bıyl álemdegi “eń myqty” pasport Birikken Arab Ámirlikterine tıesili boldy. BAÁ azamattary vızasyz 133 elge bara alady.

Ekinshi oryndy Ispanıa ıelense, úshinshi orynǵa Fınlándıa, Fransıa, Germanıa, Belgıa, Italıa, Danıa, Nıderland, Lúksembýrg, Avstrıa, Portýgalıa, Shveısarıa, Norvegıa, Grekıa jáne Irlandıa sekildi 14 eýropalyq el jaıǵasty.

Eske salaıyq, buǵan deıin 2024 jyly Qazaqstanda 1 488 308 pasport berilip, sońǵy 30 jyldaǵy rekord jańartylǵany týraly jazǵan edik.

İİM ókilderiniń málimetinshe, munyń basty sebepteriniń biri – balalarǵa arnalǵan pasporttardy rásimdeý qunynyń eki esege tómendeýi.

“Qazaqstan azamattarynyń ishinde eń jas pasport ıesi – nebári 10 kúndik sábı, al eń úlkeni – 109 jastaǵy qarıa. Readmıssıa tártibimen polısıa shetelde qujatsyz qalǵan 70 qazaqstandyqty elge qaıtardy. Sonymen qatar 41 sheteldik IT mamanyna jeńildetilgen tártippen Qazaqstanda turýǵa ruqsat berildi”, – dep habarlady vedomstvo ókilderi.