Turǵyn úi jaǵdaiyn jaqsartýǵa ótinim jibergen BJZQ salymshylarynyń arnaiy shottaryna jeltoqsan aiynda 69,5 mlrd teńge aýdaryldy. Qarasha aiymen salystyrǵanda bul kórsetkish birden 50%-ǵa ósip otyr, dep jazady Dalanews.kz.
Birinshi kredittik biýro málimetinshe, bul rettegi oryndalǵan ótinishter sany salystyrmaly qarqynmen 58%-ǵa, iaǵni 89,7 myńǵa deiin ósti.
"Emdelý maqsatymen de zeinetaqy shotynan aqsha shyǵarý kóbeidi. Atap aitqanda, mundai ótinimniń jalpy somasy ótken aimen salystyrǵanda 60%-ǵa ósse, sany 75%-dan artyp, 32,9 mlrd teńge nemese 36,5 myń boldy. Emdelý maqsatynyń bútin derlik bóligi tis emdeý qyzmeti qamtitynyn basa aita ketelik. Jeltoqsanda qazaqstandyqtardyń zeinetaqy jinaqtaryn alýdaǵy onsyz da joǵary belsendiliginiń ósýine aitarlyqtai áser etetin oqiǵalar bolǵan joq. Onyń ústine, 2025 jylǵa arnalǵan zeinetaqy jinaqtarynyń eń tómengi shekti máni burynǵy deńgeide qaldyryldy" dep jazady DATA HUB.
Jumys isteitin zeinetkerlerge biýdjettik tólemder toqtatylýy múmkin degen qarasha aiyndaǵy málimdeme jadymyzdan shyǵa qoiǵan joq. Alaida keiinirek jumys isteitin zeinetkerler óz zeinetaqy jinaqtaryn paidalanýǵa quqyly ekeni, al jańa bastamanyń qoldanysqa engizilýi kúmándi ekeni naqtylanǵan bolatyn. Degenmen orynsyz aityldy dese de bul fakt jurtqa áser etkenin bul aradan baiqaýǵa bolady.
"Jalpy, 2024 jyldyń qorytyndysy boiynsha turǵyn úi jaǵdaiyn jaqsartý jáne em aqysyn tóleý úshin BJZQ-dan alynǵan qarajattyń jalpy somasy 565,5 mlrd teńgeni qurady, bul 2023 jylmen salystyrǵanda 2,1 ese kóp. Mundai eleýli aiyrmashylyq salymshylardyń 2024 jyldyń aiaǵynda ǵana emes, búkil ekinshi jartyjyldyqta qarajatty alýda erekshe belsendilik tanytýyna bailanysty qalyptasty. Eske salaiyq, aldaǵy ýaqytta zeinetaqy jinaqtaryn alýdy shekteý týraly qoǵamdyq talqy shilde aiynda bastalǵan bolatyn", dep qorytyndylaidy óz taldaýyn biýro.
Al 2024 jyly BJZQ aktivterin basqarýshy Ulttyq bank pen ózge kompaniialar qansha tabys tapty? Ony myna aradan bile alasyzdar.
