تۇرعىن ءۇي جاعدايىن جاقسارتۋعا ءوتىنىم جىبەرگەن بجزق سالىمشىلارىنىڭ ارنايى شوتتارىنا جەلتوقسان ايىندا 69،5 ملرد تەڭگە اۋدارىلدى. قاراشا ايىمەن سالىستىرعاندا بۇل كورسەتكىش بىردەن 50%-عا ءوسىپ وتىر، دەپ جازادى Dalanews.kz.

ءبىرىنشى كرەديتتىك بيۋرو مالىمەتىنشە، بۇل رەتتەگى ورىندالعان وتىنىشتەر سانى سالىستىرمالى قارقىنمەن 58%-عا، ياعني 89،7 مىڭعا دەيىن ءوستى.

"ەمدەلۋ ماقساتىمەن دە زەينەتاقى شوتىنان اقشا شىعارۋ كوبەيدى. اتاپ ايتقاندا، مۇنداي ءوتىنىمنىڭ جالپى سوماسى وتكەن ايمەن سالىستىرعاندا 60%-عا وسسە، سانى 75%-دان ارتىپ، 32،9 ملرد تەڭگە نەمەسە 36،5 مىڭ بولدى. ەمدەلۋ ماقساتىنىڭ ءبۇتىن دەرلىك بولىگى ءتىس ەمدەۋ قىزمەتى قامتيتىنىن باسا ايتا كەتەلىك. جەلتوقساندا قازاقستاندىقتاردىڭ زەينەتاقى جيناقتارىن الۋداعى ونسىز دا جوعارى بەلسەندىلىگىنىڭ وسۋىنە ايتارلىقتاي اسەر ەتەتىن وقيعالار بولعان جوق. ونىڭ ۇستىنە، 2025 جىلعا ارنالعان زەينەتاقى جيناقتارىنىڭ ەڭ تومەنگى شەكتى ءمانى بۇرىنعى دەڭگەيدە قالدىرىلدى" دەپ جازادى DATA HUB.

جۇمىس ىستەيتىن زەينەتكەرلەرگە بيۋدجەتتىك تولەمدەر توقتاتىلۋى مۇمكىن دەگەن قاراشا ايىنداعى مالىمدەمە جادىمىزدان شىعا قويعان جوق. الايدا كەيىنىرەك جۇمىس ىستەيتىن زەينەتكەرلەر ءوز زەينەتاقى جيناقتارىن پايدالانۋعا قۇقىلى ەكەنى، ال جاڭا باستامانىڭ قولدانىسقا ەنگىزىلۋى كۇماندى ەكەنى ناقتىلانعان بولاتىن. دەگەنمەن ورىنسىز ايتىلدى دەسە دە بۇل فاكت جۇرتقا اسەر ەتكەنىن بۇل ارادان بايقاۋعا بولادى.

"جالپى، 2024 جىلدىڭ قورىتىندىسى بويىنشا تۇرعىن ءۇي جاعدايىن جاقسارتۋ جانە ەم اقىسىن تولەۋ ءۇشىن بجزق-دان الىنعان قاراجاتتىڭ جالپى سوماسى 565،5 ملرد تەڭگەنى قۇرادى، بۇل 2023 جىلمەن سالىستىرعاندا 2،1 ەسە كوپ. مۇنداي ەلەۋلى ايىرماشىلىق سالىمشىلاردىڭ 2024 جىلدىڭ اياعىندا عانا ەمەس، بۇكىل ەكىنشى جارتىجىلدىقتا قاراجاتتى الۋدا ەرەكشە بەلسەندىلىك تانىتۋىنا بايلانىستى قالىپتاستى. ەسكە سالايىق، الداعى ۋاقىتتا زەينەتاقى جيناقتارىن الۋدى شەكتەۋ تۋرالى قوعامدىق تالقى شىلدە ايىندا باستالعان بولاتىن"، دەپ قورىتىندىلايدى ءوز تالداۋىن بيۋرو.

ال 2024 جىلى بجزق اكتيۆتەرىن باسقارۋشى ۇلتتىق بانك پەن وزگە كومپانيالار قانشا تابىس تاپتى؟ ونى مىنا ارادان بىلە الاسىزدار.