قازاقستاندىق سالىمشى ءبىرىڭعاي جيناقتاۋشى زەينەتاقى قورىنا ءوز شوتىنداعى قاراجاتتىڭ ءبىر بولىگى جوعالىپ كەتكەنىن" ايتىپ شاعىمدانعان. ونىڭ سوزىنشە، زەينەتاقىداعى ارتىق سومانى "وتباسى بانكىندەگى" دەپوزيتكە اۋدارماق بولعان. الايدا شوتتاعى قاراجاتتىڭ كۇتپەگەن جەردەن ازايۋىنا بايلانىستى بۇل جوسپارى جۇزەگە اسپاعان. وسىعان بايلانىستى سالىمشى قوردان ناقتى تۇسىنىكتەمە تالاپ ەتكەن، دەپ حابارلايدى Dalanews.kz.
بجزق مالىمەتىنشە، ازاماتتاردىڭ جەكە زەينەتاقى شوتتارىنا تۇسكەن قاراجات ءتۇرلى قارجى قۇرالدارىنا ينۆەستيسيالانادى. ال ينۆەستيسيالىق تابىس تۇراقتى بولمايدى، ياعني بەلگىلى ءبىر كەزەڭدەگى كىرىس مولشەرى وزگەرىپ وتىرادى. بۇل كورسەتكىش نارىقتاعى باعالى قاعازداردىڭ قۇنىنا، ۆاليۋتا باعامىنا، اۋدارىلعان جارنالاردىڭ كولەمى مەن ۋاقىتىنا تاۋەلدى.
قور وكىلدەرىنىڭ تۇسىندىرۋىنشە، 2026 جىلدىڭ ناۋرىز ايىندا تەڭگەنىڭ دوللارعا قاتىستى نىعايۋى جانە زەينەتاقى اكتيۆتەرىن باسقارۋمەن اينالىساتىن شەتەلدىك ۇيىمدارعا سەنىمگەرلىك باسقارۋعا بەرىلگەن قارجى قۇرالدارىنىڭ نارىقتىق باعاسىنىڭ تومەندەۋى بايقالعان. بۇل جاعداي ينۆەستيسيالىق تابىستىڭ ازايۋىنا اكەلىپ، سالىمشىلاردىڭ شوتتارىندا تەرىس ينۆەستيسيالىق تابىس رەتىندە كورىنىس تاپقان.
سونىمەن قاتار قورداعىلار ينۆەستيسيالىق قايتا باعالاۋ ناتيجەسىندە شىعىن تۋىنداعان جاعدايدا، جيناق كولەمى دە، مەرزىمىنەن بۇرىن الۋعا بولاتىن قاراجات مولشەرى دە قىسقارۋى مۇمكىن ەكەنىن اتاپ ءوتتى. ەگەر سۇرالعان سوما شوتتاعى جەتكىلىكتىلىك شەگىنەن تومەن قالسا، بجزق مۇنداي قاراجاتتى مەرزىمىنەن بۇرىن الۋعا رۇقسات بەرمەيدى.
الداعى ۋاقىتتا قازاقستاندا زەينەتاقى جيناعىن مەرزىمىنەن بۇرىن الۋ ءۇشىن بەلگىلەنەتىن جەتكىلىكتىلىك شەگىن ەسەپتەۋ ادىستەمەسى قايتا قارالۋى مۇمكىن. دەگەنمەن، ەڭبەك جانە حالىقتى الەۋمەتتىك قورعاۋ مينيسترلىگى 8 ساۋىردە بۇل كورسەتكىشتەر بيىل قايتا كوتەرىلمەيتىنىن مالىمدەدى.
