Qazaqstandyq salymshy Biryńǵai jinaqtaýshy zeinetaqy qoryna óz shotyndaǵy qarajattyń bir bóligi joǵalyp ketkenin" aityp shaǵymdanǵan. Onyń sózinshe, zeinetaqydaǵy artyq somany "Otbasy bankindegi" depozitke aýdarmaq bolǵan. Alaida shottaǵy qarajattyń kútpegen jerden azaiýyna bailanysty bul jospary júzege aspaǵan. Osyǵan bailanysty salymshy qordan naqty túsinikteme talap etken, dep habarlaidy Dalanews.kz.
BJZQ málimetinshe, azamattardyń jeke zeinetaqy shottaryna túsken qarajat túrli qarjy quraldaryna investitsiialanady. Al investitsiialyq tabys turaqty bolmaidy, iaǵni belgili bir kezeńdegi kiris mólsheri ózgerip otyrady. Bul kórsetkish naryqtaǵy baǵaly qaǵazdardyń qunyna, valiýta baǵamyna, aýdarylǵan jarnalardyń kólemi men ýaqytyna táýeldi.
Qor ókilderiniń túsindirýinshe, 2026 jyldyń naýryz aiynda teńgeniń dollarǵa qatysty nyǵaiýy jáne zeinetaqy aktivterin basqarýmen ainalysatyn sheteldik uiymdarǵa senimgerlik basqarýǵa berilgen qarjy quraldarynyń naryqtyq baǵasynyń tómendeýi baiqalǵan. Bul jaǵdai investitsiialyq tabystyń azaiýyna ákelip, salymshylardyń shottarynda teris investitsiialyq tabys retinde kórinis tapqan.
Sonymen qatar qordaǵylar investitsiialyq qaita baǵalaý nátijesinde shyǵyn týyndaǵan jaǵdaida, jinaq kólemi de, merziminen buryn alýǵa bolatyn qarajat mólsheri de qysqarýy múmkin ekenin atap ótti. Eger suralǵan soma shottaǵy jetkiliktilik sheginen tómen qalsa, BJZQ mundai qarajatty merziminen buryn alýǵa ruqsat bermeidi.
Aldaǵy ýaqytta Qazaqstanda zeinetaqy jinaǵyn merziminen buryn alý úshin belgilenetin jetkiliktilik shegin esepteý ádistemesi qaita qaralýy múmkin. Degenmen, Eńbek jáne halyqty áleýmettik qorǵaý ministrligi 8 sáýirde bul kórsetkishter biyl qaita kóterilmeitinin málimdedi.
