Qazaqstandyqtar aldaǵy ýaqytta Qyrǵyzstan, Tájikstan, Ózbekstan jáne Ázerbaijanda óz bankteriniń mobildi qosymshasy arqyly QR-kodpen tólem jasai alady. Bul elder arasynda ulttyq QR-tólem júielerin biriktirý josparlanyp otyr. Jobanyń tetigi 2026 jyldyń sońyna deiin ázirlenbek, dep habarlaidy dalanews.kz.
Bul týraly Qazaqstan Ulttyq bankiniń baspasóz qyzmeti habarlady. Tájikstanda Qazaqstan, Qyrǵyzstan, Tájikstan, Ózbekstan jáne Ázerbaijan ortalyq bankteri ókilderiniń tólem júielerin birlesip damytý máselesine arnalǵan tórtinshi óńirlik kezdesýi ótti.
Jiynda Qazaqstannyń ulttyq QR-tólem júielerin ózara biriktirý týraly usynysy qoldaý tapty. Taraptar 2026 jyldyń sońyna deiin tiisti tetikti ázirleýdi josparlap otyr.
Joba júzege assa, atalǵan bes eldiń turǵyndary shetelde taýarlar men qyzmetterdiń aqysyn óz bankteriniń úirenshikti mobildi qosymshasy arqyly tólei alady. Sondai-aq bir elden ekinshi elge aqshany lezde aýdarý múmkindigi qarastyrylady.
Kezdesý barysynda qatysýshylar tólem júieleriniń turaqty jumys isteýin qamtamasyz etý, olardy kibershabýyldardan qorǵaý máselelerin de talqylady.
Budan bólek, tólem júielerin qadaǵalaýda jasandy intellekt, SupTech jáne RegTech tehnologiialaryn qoldaný, sondai-aq alaiaqtyqpen kúresýdiń ózekti tásilderi qaraldy.
