Keshe keshke Binance ámiiandarynan belgisiz mekenjailarǵa milliardtaǵan dollardyń kriptovaliýtasy aýdaryla bastaǵan. Búgin birja bul shabýyldy resmi rastady. Nátijesinde 6,3 milliard dollarlyq kriptovaliýta urlandy. Aldyn ala tergeý boiynsha, hakerler kompaniianyń DevOps injeneri paidalanǵan noýtbýkke qol jetkizip, ishki tehnologiialyq júiege engen bolýy múmkin. Nátijesinde ruqsatsyz qarjy aýdarymdary júrgizilgen, dep habarlaidy dalanews.kz Dala Inside telegram arnasyna silteme jasap.
"Binance bizdiń Astana halyqaralyq birjasynda litsenziialanǵan iri kriptobirja bolǵandyqtan, búgin birden reaktsiia boldy. Abyroi bolǵanda kriptovaliýtanyń blokchein tehnologiiasy buzylǵan joq. Aldyn ala málimet boiynsha, tsifrlyq ámiiandardyń jeke kiltteri de syrtqa shyqpaǵan. Endi kriptoaktivteri qoldy bolǵan investorlardyń ishinde Qazaqstan azamattary bar ma, sol másele anyqtalady", - dedi, DALA INSIDE derekkózi.
Búgin Binance basqa kriptokompaniialardyń kómegimen shamamen 3 milliard dollardyń aktivin buǵattaǵanyn habarlady. Biraq qalǵan 3,3 milliard dollarǵa qatysty másele tolyq sheshilgen joq. Kompaniia shyǵyndardy óziniń kapitaly jáne SAFU rezervtik qory esebinen óteitinin málimdep otyr. Degenmen bul qarajattyń barlyǵy birjola joǵaldy degen túpkilikti qorytyndy jasaýǵa áli erte. Tergeý jalǵasýda.
Biyl shilde aiynda Binance Kazakhstan teńgemen jumys isteitin retteletin P2P saýda servisin iske qosqan bolatyn. Iaǵni bul platforma otandyq qarjy infraqurylymymen de bailanysyp úlgerdi. Osy turǵydan alǵanda, qazaqstandyq naryq qatysýshylarynyń alańdaýyna negiz bar.
Birinshiden, halyqaralyq Binance infraqurylymyndaǵy qaýipsizdik máselesiniń jergilikti platformaǵa áseri qandai bolatyny mańyzdy. Ekinshiden, qazaqstandyq klientterdiń aktivteri qalai saqtalatyny jáne olardyń halyqaralyq júiedegi operatsiialardan qanshalyqty oqshaýlanǵany týraly suraq týyndaidy. Úshinshiden, kriptovaliýta men teńge arasyndaǵy aiyrbastaý operatsiialarynyń úzdiksizdigi de nazarda bolady.
Ázirge Qazaqstandaǵy Binance Kazakhstan klientteriniń qarajaty joǵalǵany nemese jergilikti platformanyń qaýipsizdik júiesi buzylǵany týraly rastalǵan aqparat joq. Sondyqtan halyqaralyq deńgeidegi oqiǵany Qazaqstandaǵy aktivterdiń tikelei joǵalýymen shatastyrýǵa bolmaidy. Alaida bul jaǵdai otandyq kriptonaryqtaǵy táýekelderdi basqarý júiesine erekshe nazar aýdarýǵa negiz beredi.
Munda taǵy bir mańyzdy ekonomikalyq másele bar. Kriptovaliýta birjasy dástúrli bank emes. Onyń klientter aldyndaǵy mindettemeleri, rezervterdi saqtaý tártibi jáne shyǵyndardy óteý mehanizmderi bank sektoryndaǵy depozitterdi qorǵaý júiesimen birdei emes. Sondyqtan Binance barlyq shyǵyndy óteimiz dep málimdegenimen, mundai ýádeniń naqty qarjylyq qamtamasyz etilýi men oryndalý merzimi sheshýshi ról atqarady.
Oqiǵa kriptovaliýta naryǵyndaǵy baǵaǵa da áser etti. Bitkoin men Ethereum arzandady, BNB tokeni de qysymǵa ushyrady. Bul jerde basty táýekel tek urlanǵan milliardtarda emes. Iri birjaǵa degen senim álsirese, investorlar aktivterin basqa alańdarǵa kóshirýge tyrysady. Mundai jaǵdaida ótimdilikke qysym kúsheiip, baǵalardyń qubylmalylyǵy artýy múmkin.
