Atyraý oblysynda sportshylar men jattyqtyrýshylardyń jarystarǵa barýyna bólingen 635,7 mln teńgeniń qalai jumsalǵanyn rastaityn qujattar tabylmady. Bul oblystyq dene shynyqtyrý, sport jáne týrizm basqarmasyna júrgizilgen aýdit kezinde anyqtaldy, dep habarlaidy dalanews.kz.
"Aq Jaiyq" basylymynyń málimetinshe, tekserý keiingi úsh jyldaǵy biýdjet shyǵyndaryn qamtyǵan. Aýditorlardyń málimetinshe, 2022 jyly óńir sportshylary men jattyqtyrýshylarynyń respýblikalyq jáne halyqaralyq jarystarǵa qatysýyna 145 mln teńgeden astam qarjy bólingen. Alaida basqarma bul qarajattyń qaida jáne qalai jumsalǵanyn kórsetetin avanstyq esepterdi usyna almaǵan.
Mundai esepter 2023 jyly bólingen 285,9 mln teńge men 2024 jylǵy 203,9 mln teńgege qatysty da berilmegen. Osylaisha, rastaityn qujattary joq qarajattyń jalpy somasy 635,7 mln teńgege jetken.
Aýdit nátijesinde biýdjet qarajatyn jumsaý, býhgalterlik esep júrgizý jáne issapar shyǵyndaryn óteý talaptarynyń buzylǵany anyqtaldy.
Ishki memlekettik aýdit departamenti sport basqarmasyna zańbuzýshylyqtardy joiyp, oǵan jaýapty qyzmetkerlerdiń máselesin qaraýdy tapsyrdy. Basqarma aýdit qorytyndysymen kelisken jáne oǵan qarsylyq bildirmegen.
Qazir sotta 635,7 mln teńgeni memleket kirisine qaitarý týraly talap-aryz qaralyp jatyr.
