Áleýmettik jelide @profiz.kz_zhuldyzay paraqshasyn júrgizetin fizika pániniń muǵalimi oqýshylardyń kanikýly kezinde pedagogterge keminde úsh kún demalys berý máselesin kóterdi, dep habarlaidy dalanews.kz.
Ustazdyń aitýynsha, kanikýl kezinde oqýshylar sabaqqa kelmegenimen, muǵalimderdiń jumysy jalǵasa beredi. Sonyń saldarynan pedagogterge kúndelikti oqý úderisinen tolyqtai alshaqtap, tynyǵýǵa múmkindik berilmeidi.
“Nege kanikýl kezinde muǵalimderge úsh kún demalys bermeske? Sol ýaqytta júike júiemiz tynyǵyp, kúndelikti jumystan bir sát alshaqtar edik. Men kúnine 180 balaǵa sabaq beremin. Olardyń arasynda sabaqty tyńdaityny da, tyńdamaityny da, buzyqtyq jasaityny da bar. Oǵan ata-analarmen jumysty qosyńyz”, – dedi muǵalim.
Ol pedagogter kanikýl kezinde de mektepke kelip, qalypty jumys tártibin jalǵastyratynyn atap ótti. Muǵalimniń pikirinshe, adamnyń miy jumys ortasynan alystap, taza aýada serýendep, basqa ispen ainalysqan kezde ǵana tolyq demalady.
“Kanikýl kezinde oqýshylardan demalatyn shyǵarmyz, biraq jumys úderisi qaitalana beredi. Mektepke kelip, áriptesterimizdi kóremiz. Sonda mi qashan demalady? Adam tynyshtyqta, dalada júrip, basqa nársege kóńil bólgen kezde ǵana tynyǵady”, – dedi ol.
Pedagog jeke sharýalary men densaýlyǵyna ýaqyt bólý de qiyn ekenin jetkizdi. Onyń sózinshe, dárigerge barý úshin eńbekke jaramsyzdyq paraǵyn ashtyrýǵa týra keledi.
“Men qazir stomatologke barýym kerek. Biraq ol úshin eńbekke jaramsyzdyq paraǵyn ashtyrýym qajet. Adam óz ómirinde ózine de ýaqyt bólýi kerek qoi. Men óz balamdy mekteptegi áriptesterimnen de az kóremin. Kúnine jumysta 12–15 saǵat júremin, al balamdy eki-úsh saǵat qana kóremin. Osyǵan ishim aýyrady”, – dedi muǵalim.
Ol kanikýl kezindegi úsh kúndik demalys pedagogterdiń kúsh jinaýyna, júikesin tynyqtyryp, jańa ideialarǵa kóńil bólýine múmkindik beretinin aitty.
“Kem degende kanikýl kezinde úsh kún demalys berilse, júike júiemiz tynyǵyp, jańa ideialardyń týýyna múmkindik bolar edi. Adamǵa tynyshtyq qajet. Muǵalimder robot emes”, – dep túiindedi pedagog.
