Eńbek jáne halyqty áleýmettik qorǵaý ministriniń buiryǵymen qandastar men qonys aýdarýshylardy qabyldaýdyń 2025 jylǵa arnalǵan óńirlik kvotasy 9 653 adam dep belgilendi, bul byltyrǵy jylmen salystyrǵanda 170 adamǵa artyq, dep habarlaidy Dalanews.kz.
Buiryqtyń maqsaty Qazaqstan Respýblikasy Úkimeti aiqyndaityn óńirlerde qandastar men qonys aýdarýshylardy ońtaily qonystandyrý. 2025 jyly óńirlik kvota oblystar boiynsha tómendegidei bólindi:
- qandastar úshin: Pavlodar oblysy – 1 056 adam, Aqmola oblysy – 285 adam, Shyǵys Qazaqstan oblysy – 269 adam, Abai oblysy – 244 adam, Soltústik Qazaqstan oblysy – 175 adam, Qostanai oblysy – 150 adam, Atyraý oblysy – 100 adam, Batys Qazaqstan oblysy – 30 adam;
- qonys aýdarýshylar úshin: Pavlodar oblysy – 3 050 adam, Soltústik Qazaqstan oblysy – 2 969 adam, Qostanai oblysy – 535 adam, Shyǵys Qazaqstan oblysy – 372 adam, Abai oblysy – 255 adam, Ulytaý oblysy – 125 adam, Qaraǵandy oblysy – 38 adam.
Qandastar men qonys aýdarýshylardy qabyldaýdyń óńirlik kvotasyna engizilgen adamdarǵa memlekettik qoldaý sharasy kórsetiletin bolady, atap aitqanda:
- kóshýge sýbsidiialar – otbasynyń árbir múshesine 70 AEK boiynsha birjolǵy tólem;
- 12 ai ishinde bir otbasyna 15-ten 30 AEK-ke deiin tólenetin turǵyn úidi jaldaý (jalǵa alý) jáne kommýnaldyq qyzmetterge aqy tóleý boiynsha shyǵystardy jabý úshin sýbsidiialar;
- 400 AEK mólsherinde qonys aýdarýǵa járdem kórsetetin jumys berýshiler úshin sýbsidiialar;
- qysqa merzimdi kásiptik oqytýǵa joldama;
- jumysqa ornalasýǵa nemese kásipkerlik bastamany damytýǵa járdemdesý;
- turǵyn úi satyp alýǵa ekonomikalyq mobildilik sertifikattaryn berý.
Esterińizge sala keteiik, 2024 jyly 19,7 myńnan astam etnikalyq qazaq tarihi otanymen tabysyp, qandas mártebesin aldy.
1991 jyldan bastap 2025 jylǵy 1 qańtar aralyǵynda 1 mln 148 myń astam etnikalyq qazaq tarihi otanyna oraldy.
