Facebook jelisiniń qoldanýshysy Nikita Nebylitskii Tigran Keosaiannyń aýyr halde jatqanyn jazdy, - dep habarlaidy Dalanews.kz.
Bul týraly áleýmettik jelidegi jazbadan belgili boldy. 27 jeltoqsan kúni aýrýhanaǵa túsken Tigran Keosaiannyń áli beti beri qaramaǵan.
"Sizderge jańalyǵym bar. Máskeýdegi bailanystarymnyń biri, joǵary laýazymdy tanysym, maǵan 27 jeltoqsanda Tigran Keosaiannyń tereń koma jaǵdaiynda aýrýhanaǵa jetkizilgenin aitty. Sodan beri ol sol jerde esh ózgerissiz jatyr. Oǵan eki ret dini qyzmetkerlerdi shaqyrǵan. Birinshisinde pravoslavielik, ekinshisinde armian-grigoriandyq. Komanyń sebebi bizge belgisiz. Múmkin, úshinshi infarkt shyǵar, óitkeni onyń aldynda eki ret infarkt bolǵan, múmkin basqa bir aýrý, nemese Býdanov joldastyń áreketteri shyǵar. Belgisiz. Biraq onyń medikamentozdy komaǵa engizilmegeni, ózdiginen komaǵa túsip, aýrýhanaǵa jetkizilgeni anyq", - dedi ol.
Aita keteiik, Dala inside telegram arnasy pále izdegen propagandistiń kýratoratyn tapty. Keosaiannyń qojaiynyn izdestirýge atsalysqan amerikalyq áriptesterge alǵystan basqa aitarymyz joq.
Bizge jetken málimet boiynsha erli-zaiypty Simonian men Keosaian Prezident ákimshiligi jetekshisiniń birinshi orynbasary Aleksei Gromovqa baǵynady. Pýtindik propaganda dep atalatyn ekojúieniń «jaiaý áskerine» jón siltep, baǵyt-baǵdar beretin dál osy – Gromov. Kreml kýlýarynda ony «Kýrator» deidi.
Bulardyń óz arasynda «asa qupiia taqyryptardy» talqylaityn «sary telefon» bar. Eshkimge tiispei tynysh jatqan Qazaqstanǵa soqtyǵý týraly buiryq osy «sary telefonnan» túsken. Tigrannyń aldyndaǵy mátin de Gromovtyń maquldaýynan ótken.
Kórshi-qolańǵa kúie jaǵatyn aqparat Tigran tárizdi propagandisterge «sary telefon» arqyly jetedi.
Gromov kim?
Ol memqupiia sanatyndaǵy málimettiń syrtqa taralmaýyn, azat oily, táýelsiz kontenttiń zombilanǵan orys qoǵamyna ótip ketpeýin baqylaityn tulǵa. Pýtindi pir tutatyn aqparattyq saiasattyń tóbe basynda tur. Kremlge baǵynyshty BAQ-tyń jumysyn júieleitin de sol.
