Qazaqstan bıylǵy jyldyń alǵashqy tórt aıynda "orta tabys tuzaǵynan" qutylyp, ekonomıkalyq qurylymyn ártaraptandyrý baǵytynda mańyzdy qadamdar jasady. Bul týraly belgili qarjy sarapshysy Aıbar Oljaı málimdedi, dep habarlaıdy Dalanews.kz.
Sarapshynyń aıtýynsha, eger el ekonomıkasy jyl sońyna deıin qazirgi serpindi qarqynyn saqtap qalsa, Qazaqstan munaı baǵasy qulaǵan kezeńniń ózinde 6 paıyzdyq ósimge qol jetkizgen "fenomenaldy ekonomıka" retinde tanylýy múmkin.
"2025 jyly qańtar-sáýir aralyǵynda Qazaqstan ekonomıkasynyń ósýi 6% boldy. Eń myqty ımpúlsti kólik jáne tasymal salasy berip otyr. Osy sala 22,4 paıyzǵa ósken. Biz jańa temir joldaryn paıdalanýǵa berý arqyly temirjoldaǵy júk tasymalyn jaqsy arttyrǵanbyz. Iaǵnı kóbirek júk tası bastadyq. Bul elimizdiń tranzıttik logıstıkalyq bıznesti jaqsy jolǵa qoıǵanyn baıqatady. Onymen qatar, tranzıttik qubyr arqyly shıkizat tasýdy da jaqsy damyttyq", — deıdi Aıbar Oljaı.
Ekonomıkalyq ósimge eleýli úles qosqan taǵy bir sala — qurylys. Bul sektorda naqty jumys kóleminiń ındeksi 16,2 paıyzǵa artqan. Sarapshynyń sózinshe, qurylys salasynyń mýltıplıkatıvtik áseri zor: ol otandyq qurylys materıaldary óndirisine de serpin berýde.
"Qurylys toqtap turǵan joq. Kóptegen óńirlerde nysandar boı kóterip keledi. Qurylystyń mýltıáseri aýqymdy ekenin eskersek, osy salanyń damýy otandyq materıal óndirisine de qoldaý kórsetýde", - dep qosty ol.
Aıbar Oljaı munaıǵa táýeldilikten arylýdyń basty joly — óńdeý ónerkásibin damytý ekenin aıtady.
"Óńdeý salasyndaǵy ósim 7,2% boldy. Onyń ishinde tamaq ónimderin óńdeý 12%-ǵa, temeki ónimderin shyǵarý 26,3%-ǵa, hımıalyq ónimderdi óndirý 11,2%-ǵa jáne mashına jasaý 11,2%-ǵa artyp otyr", - deıdi ol.
Sarapshy hımıa salasyndaǵy ósimge álemdik alpaýyt Henkel kompanıasynyń yqpal etkenin atap ótti. Kompanıa Reseıdegi keńsesin Qazaqstanǵa kóshirip, Qonaev qalasyndaǵy zaýyttyń óndiristik qýatyn ulǵaıtqan.
"Alpaýyttyń Qonaev qalasyndaǵy hımıa zaýyty óndiristik qýatyn artyryp, qazirgi tańda Qazaqstanda shyǵarylǵan ónim búkil Ortalyq Azıa men Kavkazdy qamtyp otyr", - deıdi ol.
Temeki óndirisinde de iri jobalar júzege asyrylýda. Almaty oblysynda Philip Morris kompanıasy IQOS stıkterin shyǵara bastasa, koreıalyq KT&G kompanıasy da osy óńirde zaýyt ashyp, tolyqqandy jumysqa kiristi.
"Oljas Bektenovtyń dáýirinde Qazaqstan munaıǵa degen basy bútin táýeldilikten aqyryndap qutyla bastaǵan sıaqty. Biz 30 jyl boıy «osyny nege istemeske» dep keldik. Endi munaı ǵasyrynyń aıaqtalýyna degen daıyndyǵymyzdy jalǵastyra berý qajet. Jaqyn jyldary bizdiń ekonomıkalyq qurylymda shıki munaı úlesin 15 paıyz deńgeıine deıin túsire alsaq, shıkizattyq baǵyttan óńdeýshi baǵytqa transformasıany sátti aıaqtadyq dep esepteı alamyz. Biraq ol úshin áli kóp sharýa tyndyrý qajet", — deıdi Aıbar Oljaı.
