Túrkistan oblysynyń kolledjderinde jańa mamandyqtardy engizý boiynsha jumystar jalǵasyp jatyr. Memlekettik tapsyrys ta naqty qajetti mamandyqtarǵa bólinbek,- dep habarlaidy Dalanews.kz
Bul másele 2025-2026 oqý jylyna tehnikalyq jáne kásiptik, orta bilimnen keiingi bilimi bar kadrlardy daiarlaýǵa arnalǵan memlekettik bilim berý tapsyrysyn qalyptastyrý men bólý jónindegi komissiia májilisinde keńinen talqylandy.
Túrkistan oblysy ákiminiń orynbasary Beisenbai Tájibaev jaýaptylarǵa zerdeleý, mamandyqtardy durys úilestirý jónindegi jumystardy jandandyrýdy tapsyrdy.
– Oblys ákimi Nuralhan Oralbaiuly kolledjderdiń jumysyn jandandyrý, qoǵamǵa qajetti mamandyqtardy engizý jóninde tapsyrma berdi. Óńirde eńbek naryǵynyń qajettilikterin qamtamasyz etip, tehnikalyq jáne kásiptik, orta bilimnen keiingi bilimi bar kadrlarmen qamtamasyz etý úshin jyl saiyn biýdjetten memlekettik bilim berý tapsyrysy bólinýde. 2025-2026 oqý jylyna memlekettik bilim berý tapsyrysyn qalyptastyrý jáne bólý úshin basqarmalar men aýdan, qala ákimdikterinen usynystar jinalǵan. Atalǵan suranystardy naqtylaý týraly tapsyrma berilip, búgingi kúnge 100 mamandyq boiynsha 22 037 orynǵa qajettilik anyqtalyp otyr. Naqty qajetterin júielep, usynys engizińizder. «Jumysshy mamandyqtary jyly» aiasynda jumysshy mamandyqtarǵa basymdyq beriletinin nazarda ustańyzdar. Kolledjge túsken árbir stýdent jumyspen qamtylyp, ómirden óz oryndaryn tabýlary tiis, – dedi Beisenbai Tájibaev.
Májiliste Oblystyq bilim basqarmasy basshysynyń mindetin atqarýshy Aigúl Qasymbekova baiandama jasady. 2025-2026 oqý jylyna kolledjderge memlekettik bilim berý tapsyrysynyń kólemin bekitý úshin suranystar jinalǵan. 2024-2025 oqý jylyna 15 500 orynǵa memlekettik bilim berý tapsyrysyn bólýge jetkilikti qarjy qaralyp otyr. Komissiia músheleri osy granttar úlestiriletin mamandyqtardy zerdelep, óz usynystaryn aitty. Keibir suranystar qysqartylsa, tehnikalyq mamandyqtar boiynsha tapsyrys sany kóbeitildi. Bul baǵyttaǵy zerdeleý, júieleý jumystary jalǵasady.
Aldaǵy oqý jyldarynda Túrkistan oblysynda baq-saiabaq sharýashylyǵy, jylyjai sharýashylyǵynyń operatory, ǵimarattardy jobalaý men paidalanýdyń avtomattandyrylǵan júieleri, aqparattyq qaýipsizdik júieleri, lift sharýashylyǵy jáne eskalatorlar, et jáne et ónimderin óndirý, haýs-master, ushqyshsyz ushý apparattarynyń operatory, temir joldyń vagondaryn jóndeý jáne tehnikalyq qyzmet kórsetý mamandyqtary ashylady dep kútilýde.
