Elimizde jer qatynastary salasynda aitarlyqtai oń ózgerister baiqalyp keledi. Qonaev qalasy ákimdiginiń jer qatynastary bólimi Dalanews.kz agenttigine bergen resmi jaýabynda bul baǵytta qabyldanyp jatqan sharalar týraly baiandady. Mekeme málimetinshe, búginde basty maqsat: jer resýrstaryn tiimdi paidalaný, tsifrlandyrýdy kúsheitý jáne paidalanylmai jatqan ýchaskelerdi memleket menshigine qaitarý.
Bólimniń habarlaýynsha, jer qatynastary salasyndaǵy memlekettik qyzmetter tolyq tsifrlyq formatqa kóshirilip jatyr.
"Qazaqstan Respýblikasynyń keibir zańnamalyq aktilerine jer qatynastary salasyndaǵy memlekettik kórsetiletin qyzmetterdi tsifrlandyrý máseleleri boiynsha ózgerister men tolyqtyrýlar engizildi. Osyǵan sáikes jer ýchaskesine quqyq berý protsesi endi "Jyljymaityn múliktiń biryńǵai memlekettik kadastrynyń avtomattandyrylǵan jumys orny" (ARM EGKN) júiesi arqyly júzege asyrylady", – delingen mekeme habarlamasynda.
Bul júie azamattarǵa qyzmet alý kezinde yńǵaily jaǵdai jasap qana qoimai, ashyqtyq pen tiimdilikti arttyrýǵa múmkindik beredi.
Paidalanylmai jatqan jerler memleketke qaitarylýda
Vedomstvonyń málimetinshe, sońǵy ýaqytta jerdi paidalanýǵa qoiylatyn talaptar kúsheitilip, tsifrlyq arnalar arqyly kórsetiletin qyzmetterge qol jetkizý jeńildegen. Sonymen qatar jerdi jalǵa alý salasyndaǵy teris paidalanýshylyqtyń aldyn alý maqsatynda naqty sharalar qabyldanǵan.
"Paidalanylmai jatqan jaiylym jerler boiynsha júrgizilgen monitoring nátijesinde 440 gektar jer sot arqyly, al 450 gektar jer óz erkimen memleket menshigine qaitaryldy. Budan bólek, 6955 gektar jer ýchaskeleri boiynsha salyq mólsherin 20 esege ulǵaitý týraly usynys Almaty oblysynyń jer resýrstaryn basqarý departamentine joldandy", – deidi mamandar.
Sondai-aq kommertsiialyq maqsatta paidalanylmai jatqan 40,4 gektar jer memleket menshigine qaitarylyp, taǵy 400 gektar jerdi memleket qoryna qaitarý boiynsha sotqa talap aryz joldanǵan.
"Qazaqstan Respýblikasynyń Prezidenti Qasym-Jomart Toqaevtyń tapsyrmasyna sáikes, Qonaev qalasynda paidalanylmai jatqan jerlerdi memleket menshigine qaitarý jumystary júieli túrde júrgizilip jatyr", – dep naqtylady bólim ókilderi.
Aýyl sharýashylyǵy jerlerin tiimdi paidalaný – basty nazarda
Mekemeniń habarlaýynsha, aýyl sharýashylyǵyna arnalǵan jerlerdiń tiimdi paidalanýyn qamtamasyz etý úshin de zańnamaǵa birqatar mańyzdy ózgerister engizilgen.
"Jer kodeksiniń 33-babyna engizilgen túzetýlerge sáikes sharýalar ýaqytsha jer paidalaný quqyǵymen alǵan ýchaskelerin bes jyl ishinde ielikten shyǵara alady. Bul norma jerdiń utymdy paidalanylýyna jáne sapasyn jaqsartýǵa múmkindik beredi", – delingen jaýapta.
Sonymen qatar aýyl sharýashylyǵyna arnalǵan jerlerdi shetel azamattaryna jáne jeke menshikke berýge jariialanǵan moratorii áli de kúshinde. Bul qadam jer paidalanýshylardyń jaýapkershiligin arttyrýǵa baǵyttalǵan.
Tsifrlyq kadastr – jer esebin júrgizýdiń jańa kezeńi
Qazir jer kadastrynyń elektrondyq derekter qory engizilip, jumystar júielene túsken.
"Biryńǵai memlekettik jyljymaityn múlik derekter qorynyń tsifrlanýy paidalanylmai jatqan jerlerdiń ornalasýyn naqty kórýge jáne málimetterdi jyldam jinaqtaýǵa múmkindik berdi", – dep málimdedi bólim ókilderi.
Mekemeniń aitýynsha, aldaǵy ýaqytta engiziletin jańa reformalar men bastamalar jerdi nysanaly maqsatyna sai jáne zań talaptaryn saqtai otyryp tiimdi paidalaný mindetin kózdeidi.
Qonaev qalasy ákimdiginiń jer qatynastary bólimi atap ótkendei, bul bastamalardyń barlyǵy el Prezidentiniń tapsyrmasyna sáikes júzege asyp jatyr jáne jerdi tiimdi igerý men aýyl sharýashylyǵy áleýetin arttyrýdy maqsat etedi.
