Qazaqstannyń Memlekettik kirister komiteti (MKK) sheteldik onlain-saýda alańdary elde tirkelip, qosymsha qun salyǵyn (QQS) tóleýi tiis ekenin eskertti. Bul talapty oryndamaǵan marketpleisterge el aýmaǵynda jumys isteýge tyiym salynady, dep habarlaidy Dalanews.kz.
MKK QQS ákimshilendirý basqarmasynyń basshysy Edil Ázimshaiyqtyń aitýynsha, sheteldik marketpleisterde qazaqstandyqtar jasaǵan onlain-satyp alýlarǵa qatysty salyqty paidalanýshylar emes, sol platformalardyń ózderi tóleýge mindetti.
"Biz olarǵa tirkelý qajettigi týraly habarlamalar jiberemiz. Bank operatsiialaryn buǵattaý sharasy qoldanylmaidy, óitkeni olardyń Qazaqstanda shottary joq. Alaida ózge tetik bar – eger eskertý oryndalmasa, olardyń internet-resýrstaryna qoljetimdilik toqtatylady", – dedi Ázimshaiyq.
Qarapaiym tilmen aitqanda, eger sheteldik marketpleis Qazaqstanda tirkelmei, QQS tóleýdi bastamasa, qazaqstandyq paidalanýshylar onyń saityna kire almaidy.
"Tirkelmegen kompaniialar Qazaqstan aýmaǵynda jumysyn jalǵastyra almaidy", – dep naqtylady ol.
Memlekettik kirister komiteti zań buzǵan kompaniialardy Ulttyq bank jáne ekinshi deńgeili banktermen birlese otyryp anyqtaidy. Ol úshin sheteldik internet-kompaniialarǵa jasalatyn tólemder taldanady.
2026 jyldan bastap mundai onlain-platformalar úshin QQS mólsherlemesi jalpy salyq tóleýshilerge arnalǵan tártippen 12%-dan 16%-ǵa deiin ósedi.
"Bul talap sheteldik kompaniialarǵa qatysty. Olar Qazaqstanda tirkelýge mindetti, biraq ádilet organdary arqyly emes – shartty tirkeý túrinde. Biz arnaiy reestr engizemiz. Tizimge engender qazaqstandyq azamattardyń satyp alýynan túsken tabysqa QQS tóleidi. Sheteldik kompaniialar bul salyqty ai saiyn, kelesi aidyń 20-syna deiin aýdarady", – dep túsindirdi Ázimshaiyq.
Onyń aitýynsha, mundai alańdarǵa baqylaý turaqty túrde júrgizilip otyrady.
